Իրավաբաններն ու իրավապաշտպաններն ապօրինություն և խայտառակություն են որակում Երևանի փոխոստիկանապետ, հանրային բողոքի ակցիաների ժամանակ առանցքային դերակատարություն ստանձնող Վալերի Օսիպյանի եղբոր որդու մասնակցությամբ երեք օր առաջ տեղի ունեցած դանակահարության կապակցությամբ իրավապահների գործելաոճը:
Ոստիկանությունն այսօր հաղորդագրություն տարածեց 3 օր առաջ տեղի ունեցած դանակահարության մասին՝ նշելով, որ Նուբարաշենում դանակահարվել է 22-ամյա Վանուշ Ալեքսանյանը: Նա, ի դեպ, զրկվել է փայծաղից: Ըստ ոստիկանության, պարզվել է, որ վնասվածքը պատճառել է 22-ամյա Սեդրակ Օսիպյանը: Սեդրակը Վալերի Օսիպյանի եղբոր որդին է, որի նկատմամբ որպես խափանման միջոց է ընտրվել կալանքը, հայտարարվել է հետախուզում:
Նուբարաշենի բնակիչ Սուսաննա Հովհաննիսյանը երեկվանից պնդում է՝ Վալերի Օսիպյանն իրեն առաջարկել է, որ դանակահարության պատասխանատվությունը ստանձնի նրա որդին՝ Սարգիս Հովհաննիսյանը, որը ևս մասնակցել է հունիսի 1-ի վիճաբանությանը:
«Դա իրականությունը չէ, երկարամյա աշխատանքային փորձ ունեմ, բարձրաստիճան սպայի կոչում եմ կրում, այստեղ մարդ է պատժվելու, հետաքննություն արեք, թե ով է դրանում շահագրգռված»,- հակադարձեց Վալերի Օսիպյանը՝ խորհուրդ տալով պարզել, թե ով է Սուսաննա Հովհաննիսյանը։
Կարդացեք նաև
Մեր զրուցակից իրավաբանները պնդում են, որ Սուսաննա Հովհաննիսյանի հայտարարության հրապարակումից հետո անհապաղ, դեռ երեկ պետք է Հատուկ քննչական ծառայությունում հարուցվեր քրեական գործ: Քրեական գործ, սակայն, չի հարուցվել:
Թե ինչն է պատճառը, որ քրեական գործ չի հարուցվել իր ազգականի փոխարեն պատասխանատվությունն ուրիշի վրա բարդելու՝ Օսիպյանի առաջարկի մասին բարձրաձայնող հրապարակումից հետո, Հատուկ քննչական ծառայությանն ուղղված «Ազատության» գրավոր հարցին ի պատասխան նշված է.- «Վալերի Օսիպյանին վերագրվող հայտարարության կապակցությամբ ՀՀ հատուկ քննչական ծառայությունում քրեական գործ չի հարուցվել, այդ մասին մամուլի հրապարակման կապակցությամբ քրեադատավարական բնույթի որևէ որոշում չի կայացվել` քրեադատավարական օրենսդրությամբ սահմանված առիթի և քրեական գործ հարուցելու հիմքերի բացակայության պատճառով»:
Մանրամասները կարող եք կարդալ` «Ազատություն» ռ/կ-ի կայքում
