Այսօր Արագածոտնի, Արարատի, Արմավիրի, Գեղարքունիքի, Լոռիի, Կոտայքի, Շիրակի, Սյունիքի եւ Վայոց ձոր մարզերի մի շարք համայնքներում ընթանում են տեղական ինքնակառավարման մարմինների ընտրություններ:
Այս պահի դրությամբ ԿԸՀ-ն քվեարկության ընթացքի հետ կապված որեւէ ահազանգ կամ դիմում-բողոք ընտրախախտումների վերաբերյալ չի ստացել: Aravot.am-ի հետ զրույցում ԿԸՀ նախագահի մամուլի քարտուղար Հերմինե Հարությունյանը նշեց, որ ժամը 14.00-ի դրությամբ ունեն ընտրողների մասնակցության տվյալները:
Ամփոփելով այդ տվյալները՝ կարող ենք ասել, որ այն համայնքներում, որտեղ միակ թեկնածուն ՀՀԿ-ի ներկայացուցիչն է, իսկ մյուս թեկնածուները ինքնաբացարկ են հայտնել, այդ համայնքներում մասնակցության թիվը առայժմ չի անցնում 10 տոկոսը:
Վայոց ձորի Խաչիկ գյուղում գրանցված է 2 թեկնածու՝ անկուսակցական, գործող համայնքապետ Վարդան Ներսիսյանը եւ անկուսակցական Հովիկ Սմբատյանը: Այդ համայնքում մասնակցել է ընտրողների 45.86 տոկոսը՝ ժամը 14.00-ի դրությամբ: Կոտայքի մարզի Գետամեջ համայնքում ԲՀԿ-ական համայնքապետ Ավետիս Մուրադյանը մրցակցում էր անկուսակցական, հենց իր գյուղապետարանի աշխատակից Սասուն Մինասյանի հետ, որն ինքնաբացարկ է հայտնել եւ մնացել է միայն համայնքապետը: Այդ համայնքում մասնակցությունը 10 տոկոս է:
Արագածոտնի Նիգավան համայնքում ՀՀԿ-ական համայնքապետ Արտաշես Գալստյանի անկուսակցական մրցակիցը նույնպես ինքնաբացարկ էր հայտնել, եւ այդ համայնքում մասնակցությունը 14 տոկոս է:
Կարդացեք նաև
Ապարանում գրանցված է 2 անկուսակցական թեկնածու՝ Օհան Գասպարյանն ու Հենրիկ Հովհաննիսյանը: Ակնհայտ է, որ այդ համայնքում ընտրությունները քիչ թե շատ մրցակցային են, եւ մասնակցությունը կազմել է 46 տոկոս՝ ժամը 14.00-ի դրությամբ:
Սյունիքի մարզի Օխտարում մասնակցել է ընտրողների 45 տոկոսը:
Գեղարքունիքի Փոքր Մասրիկում, որտեղ միմյանց հետ մրցակցում են 2 ՀՀԿ-ականներ՝ համայնքապետը եւ ինքնառաջադրված հանրապետական Գագիկ Սարոյանը, մասնակցությունը կազմել է 58 տոկոս:
Ջերմուկում 3 թեկնածուներից մեկն ինքնաբացարկ է հայտնել, եւ հիմա համայնքի ղեկավար լինելու համար պայքարում են ՀՀԿ-ի ներկայացուցիչ Վարդան Հովհաննիսյանն ու անկուսակցական Կորյուն Ստեփանյանը:
«Այստեղ առավոտվանից մինչեւ հիմա քվեարկությունները խաղաղ հունով են ընթանում, ոչ մի անկարգություն տեղի չի ունեցել: Թեկնածուների վստահված անձինք ասում են, որ ոչ մի կեղծիք չի եղել: Ամեն ինչ մեզ մոտ նորմալ է: Ակտիվ մասնակցություն ընթացում է Ջերմուկի 39/2 ընտրատարածքում, որտեղ հոսքն անընդհատ ավելանում է, ինչը չէի ասի 39/3 –ի մասին»: Aravot.am-ի հետ զրույցում Ջերմուկում ընտրությունների ընթացքի վերաբերյալ տեղեկատվություն տվեց Ջերմուկում աշխատող լրագրող Նարեկ Միրզոյանը: Նա ասաց, որ երկու թեկնածուներն էլ ակտիվ քարոզչություն են արել, բայց ավելի մեծ թվով մարդիկ են հավաքվել գործող համայնքապետի հանդիպումների ժամանակ: Մեր հարցին՝ ճնշումներ անկուսակցական թեկնածուի նկատմամբ կա՞ն ՀՀԿ-ի կողմից՝ Նարեկ Միրզոյանը պատասխանեց. «Ոչ մի ճնշում, ոչ մի նման բանի մենք ականատես չենք եղել»:
Հռիփսիմե ՋԵԲԵՋՅԱՆ
