«Երկրորդ օրը, որ եկանք, երեխես շոկի մեջ ասաց մամ ջան մի բողոքի, լավ կլինի: Թող իրենք ծախս-մախսը փակեն, ամեն ինչ կպրծնի: Մամ ջան էդ երեխեն ոչ մի տույժ էլ չի անելու, որովհետեւ լավ էլմեջք ունի»,- մի քանի օր առաջ «Ազատություն» ռադիոկայանին պատմում էր հունիսի 1-ին տեղի ունեցած վիճաբանության ժամանակ դանակահարված Նուբարաշենի բնակիչ, 22-ամյա Վանուշ Ալեքսանյանի մայրը՝ Լիլյա Ալեքսանյանը: «Լավ մեջք ունի» ասելով՝ նա նկատի ուներ որդուն դանակահարողին:
Հիշեցնենք, որ ըստ շրջանառվող լուրերի, դանակահարողը Երեւանի փոխոստիկանապետ Վալերի Օսիպյանի եղբորորդին էր՝ Սեդրակ Օսիպյանը:
Այսօր արդեն Aravot.am-ի հետ զրույցում տիկին Ալեքսանյանը մասամբ հրաժարվում է իր խոսքերից՝ պնդելով, թե տաքացած է եղել, խոսել է. «Էդ օրը շոկի մեջ եմ եղել, շատ բան եմ ասել»: Թե ում նկատի ուներ «լավ մեջք ունի» ասելով՝ նա այսօր արդեն չի հստակեցնում:
Դեպքի ականատես, Նուբարաշենի բնակիչ Գոհար Կարապետյանն էլ մեզ հետ զրույցում պատմում էր, որ տիկին Ալեքսանյանը որդու դանակահարության ժամանակ դրսում է եղել, որ նա նույնիսկ տեսել է դանակահարողին՝ Վալերի Օսիպյանի եղբորորդուն, ու պտտվել ցույց է տվել, թե որ շենքում է ապրում այդ երիտասարդը, նկարագրել նրան՝ շեկ մազերով, կապուտաչյա, նույնիսկ նշել է, որ ռուսախոս է ու ռուսերենով հայհոյում էր, ասել է միայն անունը չի հիշում, հենց տեսնի, կճանաչի: Իսկ որդուն ազատելու համար, նույնիսկ քաշել է նրա մազերը: Տիկին Ալեքսանյանը պնդում է՝ ինքը նման բաներ ասել է, բայց իր իսկ մատնանշած կապուտաչյա ռուսախոս երիտասարդի ձեռքին դանակ չի տեսել ու չի կարող վստահ ասել, որ հենց այդ երիտասարդն է որդուն դանակահարողը. «Չէ, չէ, չեմ ճանաչում: Ոչ մեկի չեմ տեսել, մութ էր: Չէ տղաս էլ չի իմացել, ով է խփել, ոնց է խփել: Հեսա խոսեցնում ենք, ասում է՝ մամա չեմ էլ զգացել՝ ինչ է կատարվել հետս»: Տիկին Ալեքսանյանի պատմելով, որդին դեռ հիվանդանոցում է, բարձր ջերմություն էլ չի իջնում, ինչի պատճառով էլ նրան դեռ չեն հարցաքննել. «Եկել, գնացել են, երեխես ի վիճակի չէ բան ասելու: Վիճակ չունի երեխես»:
Կարդացեք նաև
Նուբարաշենի բնակիչների պատմելով՝ կապուտաչյա այդ երիտասարդը հենց Սեդրակ Օսիպյանն է:
Լիլյա Ալեքսանյանից հետաքրքրվեցինք՝ Վալերի Օսիպյանի հետ չե՞ք զրուցել, ասաց. «Չէ, հա»: Մեր դիտարկմանը, թե Նուբարաշենի բնակիչները պնդում են, որ Վալերի Օսիպյանը առաջարկել է հոգալ ձեր որդու բուժման ծախսերը, որ չբողոքեք, տիկին Ալեքսանյանը պատասխանեց. «Հիմա հլը որ իմ ուժերով եմ անում, բարեկամներս են օգնում: Չէ հլը, որ Վալերի Օսիպյանը ոչ մի բան չի արել, դեռ ձեն ձուն չկա»:
Մեր հարցին՝ չե՞ք բողոքելու, ասաց՝ հիմա միայն որդու ապաքինման մասին է մտածում. «Հետո կտեսնենք»:
Արփինե ՍԻՄՈՆՅԱՆ
