Հայաստանում Բրազիլիայի դեսպանությունն այսօր բրազիլական երգի երեկո էր կազմակերպել Հայ ավետարանչական կենտրոնի սրահում, որին մասնակցում էին դիվանագետներ, մշակույթի գործիչներ: Մասնավորապես ներկա էին Հայաստանում ԱՄՆ, Ուկրաինայի, Բրազիլիայի դեսպանները:
Համերգի ընթացքում, որի խորագիրն էր «A journey through Brazilian music», հնչեցին բրազիլական երաժշտության արդեն դասական դարձած հիթեր: Բրազիլական կրքոտ ռիթմերը հանդիսատեսին հասցրին երգչուհի Անուշ Բադալյանը եւ մյուս տաղանդավոր հայ երաժիշտները՝ Արմեն Հյուսնունցը, Նելլի Մանուկյանը, Խաչիկ Սահակյանը, Արթուր Սողոյանը, Վարդան Առաքելյանը, Էդուարդ Հարությունյանն ու Արման Ջալալյանը:
Կարդացեք նաև
Համերգի ավարտին բեմ բարձրացավ Հայաստանում Բրազիլիայի արտակարգ ու լիազոր դեսպան Էդսոն Մարինյո Դուարտե Մոնտեյրոն եւ հայ երաժիշտներ հետ մի երգ էլ ինքը երգեց: Պարզվում է դեսպանը նաեւ սաքսոֆոն է նվագում ու մի անգամ հանդես է եկել բրազիլական փառատոներից մեկի ժամանակ:
Ավելի վաղ Անուշ Բադալյանի հետ երգեց նաեւ Հայաստանում Ուկրաինայի դեսպան Իվան Կուխտայի գեղեցկուհի տիկինը: Համերգի ավարտին բրավոներ հնչեցին ու հանդիսատեսը հեռացավ դրական էներգիայով լիցքավորված: Բրազիլական երաժշտությամբ ճամփորդությունը ստացվել էր:
Գոհար ՀԱԿՈԲՅԱՆ
