Այսօր Երեւանում անցկացվեց «Կարիերայի ուղղորդման հիմնախնդիրները եւ զարգացման միտումները» խորագրով գիտաժողովը, որի նպատակն է Հայաստանի դպրոցներում եւ ԲՈՒՀ-երում ընդլայնել մասնագիտական կողմնորոշման ոլորտի ընտրության հնարավորությունները:
ՀՀ աշխատանքի եւ սոցիալական հարցերի նախարար Արտեմ Ասատրյանը գիտաժողովի ընթացքում լրագրողների հետ զրույցում նշեց, որ կարիերայի ուղղորդումը որպես գիտական ծառայություն շատ կարեւորում է Հայաստանում. «Այսօրվա աշխատաշուկայում տեղի ունեցող փոփոխություններն ուղղակի պարտադրում են, որպեսզի քաղաքացիները կարիերայի ուղղորդման վերաբերյալ տեղեկություններ ստանան, որն էլ թույլ կտա աշխատաշուկայի փոփոխվող պայմաններին համապատասխանող մասնագիտություն ունենալ»:
Պրն Ասատրյանի խոսքով՝ բավականին լուրջ խնդիր է, երբ քաղաքացին իր մասնագիտությանը համապատասխան աշխատանք չի գտնում. «Սա մենք կոչում ենք կառուցվածքային գործազրկություն, ինչը առկա է Հայաստանում: Շատ դեպքերում էլ կան տարբեր աշխատատեղեր, բայց չկան համապատասխան մասնագետներ: Դրա համար կարեւորում ենք, որպեսզի քաղաքացիները անընդհատ տեղեկատվություն ստանան այս ուղղությամբ եւ կարողանան կառուցել իրենց կարիերան ամբողջ կյանքի ընթացքում»:
Պրն Ասատրյանը տեղեկացրեց, որ մարզերի եւ Երեւանի մի քանի դպրոցներում իրականացվում են փորձնական ծրագրեր՝ դասընթացներ, ուսուցիչների վերապատրաստումներ: «Ստեղծվել են նաեւ թեստեր, որոնք թույլ են տալիս ստուգել, թե որ մասնագիտությունն է համապատասխանում տվյալ անձին: Ծրագիրը իրականացվում է փորձնական տեսքով ՝ սկսելով դպրոցներից, որպեսզի այն աշակերտները, որոնք նոր պետք է ավարտեն դպրոցը ավելի հստակ իմանան, թե ինչ մասնագիտություն կցանկանան ընտրել, որով էլ հետագայում կաշխատեն»:
Կարդացեք նաև
Աշխատանքի եւ սոցիալական հարցերի նախարարության Մասնագիտական կողմնորոշման մեթոդական կենտրոն ՊՈԱԿ տնօրեն Հայկուհի Գեւորգյանն էլ նշեց, որ հետազոտությունների արդյունքում պարզ է դարձել, որ Հայաստանի դպրոցներում չեն իրականացվում ծրագրեր, որոնք աշակերտներին կուղղորդեն դեպի ապագա մասնագիտությունը, իսկ բուհերում վերջերս են ստեղծվել կարիերային կենտրոնները: Սակայն, նրա խոսքերով, այդ կենտրոններն էլ բավարար չեն, որպեսզի շրջանավարտը ավարտելուց հետո հեշտությամբ աշխատանք գտնի:
«Կարիերայի ուղղորդման հիմնախնդիրները եւ զարգացման միտումները» գիտաժողովը նախաձեռնել է ՀՀ աշխատանքի եւ սոցիալական հարցերի նախարարությունը եւ աշխատանքի եւ սոցիալական հարցերի նախարարության Մասնագիտական կողմնորոշման մեթոդական կենտրոն ՊՈԱԿ-ը:
Էլյա ՀՈՎՀԱՆՆԻՍՅԱՆ
