Այսօր՝ հուլիսի 5-ին, Սահմանադրության օրվա առթիվ Ղարաբաղ կոմիտեի նախկին անդամ Աշոտ Մանուչարյանը հանդիպեց «Արատտա» երիտասարդական ակումբի անդամների հետ:
Սեմինար-քննարկման ընթացքում մասնակիցները քննարկեցին սահմանադրական խնդիրները, պարոն Մանուչարյանը ներկայացրեց նրանց, թե ի՞նչ է սահմանադրությունը եւ ո՞րն է նրա պատմությունը:
«Արատտա» երիտասարդական ակումբի մամլո քարտուղար Հովիկ Վերանյանը Aravot.am-ի հետ զրույցում նշեց, որ քննարկման հիմնական նպատակը նոր սահմանադրության ստեղծումն է, որը կբխի Հայաստանի շահերից եւ կտանի դեպի իրական զարգացում: Նա նշեց, որ երիտասարդական ակումբը կարծում է, որ ներկայիս սահմանադրությունը կատարյալ չէ, նամանավանդ, այն դեպքում, երբ սահմանադրությունը թարգմանված է.
«Արատտա» երիտասարդական ակումբն իր նպատակներից մեկը հռչակել է հայկականությունը, այսինքն՝ նոր պահպանողականությունը, քանի որ կան բավականին լավ արվեստներ, որոնք մնացել են հետեւում, եւ կան արվեստներ, որոնք նորացման կարիքն ունեն՝ այսօրվա մարտահրավերներին համարժեք: Այսինքն` ակումբը եւս կարծում է, որ այսօրվա սահմանադրությունը կատարյալ չէ, այսինքն` չի արտահայտում հայկականը: Մեր սկզբունքն է ստեղծել հենց հայկական սահմանադրություն, որը կարտահայտի մեր շահերը եւ կնպաստի մեր զարգացմանը»:
Կարդացեք նաև
Նա խոստովանեց, որ ռազմավարական սահմանադրության գաղափարն առաջին անգամ հենց Աշոտ Մանուչարյանից են լսել եւ այդ պատճառով են հենց նրան հրավիրել մասնակցելու իրենց քննարկմանը:
Աշոտ Մանուչարյանը մեզ հետ զրույցում նշեց, որ շատ բարձր է գնահատում «Արատտա» երիտասարդական ակումբի այս նախաձեռնությունը: Նա խոստովանեց, որ կարեւորում է այն փաստը, որ երիտասարդները ցանկանում են հասկանալ, թե իրենց շուրջ ի՞նչ է կատարվում.
«Մոլորությունը շատ մեծ է, ցավոք սրտի, իրական գիտելիք ստանալու հավանականությունը՝ շատ ցածր: Նույնիսկ ԽՍՀՄ տարիներին դպրոցում, բուհում շատ ավելի շատ գիտելիքներ էինք ստանում, եւ ինչը, որ չկար օրինական, բոլորը կարդում էին եւ նրանց շրջանառությունը ավելի մեծ էր: Իսկ այսօր իրական իրավիճակի հետ ծանոթ չեն. Կա հեռուստացույցը, կա ինտերնետը, որը անհեթեթ բաներ է ասում, խաբում, մոլորեցնում ժողովրդին, հատկապես՝ երիտասարդությանը: Եվ այդ պատճառով էլ ուրախալի է, որ երիտասարդները փորձում են հասկանալ, թե ի՞նչ է կատարվում»:
Անդրադառնալով Հայաստանի սահմանադրությանը պարոն Մանուչարյանը հայտարարեց, որ սահմանադրությունը դրսից է թելադրված: Նրա խոսքերով՝ ՀՀ սահմանադրությունը հայ ազգի եւ նրա ցանկությունների հետ կապ չունի.
«Ապրող սերունդների պապերը հիմա իրենց թոռնիկների կյանքը փչացնում են: Այստեղ ամայի դաշտեր են, իրենց թոռնիկները հիվանդանում են բազմաթիվ հիվանդություններով, որովհետեւ հիմա պապը իրեն պետք է Բենթլի առնի, այսինքն` եթե պապը այդ ֆիլմը տեսնի՝ իր թոռանը ի՞նչ է թողնում, պապն այսօր կմեռնի: Բայց քանի որ պապն այսօր օլիգարխ է, նախարար է, կուսակցական պաշտոնյա է, նա ոչնչացնում է իր թոռան ապագան՝ դարձնում է նրան հիվանդ, նրա հնարավոր հարսնացուին դարձնում է պոռնիկ, իրեն դարձնում է աստված գիտի՝ ինչ, բայց ինքը չի մտածում: Սահմանադրությունը դա է՝ այդ սահմաններն ենք դրել այս կյանքում, որը մեզ հետ ոչ մի կապ չունի»:
Ամի ՉԻՉԱԿՅԱՆ
