Դեսպանատան այգում
Վաղը Ֆրանսիայի դեսպանատան առջեւից կմեկնարկի RAID VTT բազմօրյա հեծանվավազքը, որն ավանդաբար կազմակերպում են. Ֆրանսիական կողմից՝ Նոր Պա-դը-Կալե շրջանի «Ընդունելություն եւ հանգրվան» ասոցիացիան, որը ֆրանսիայում հյուրընկալում է դժվար կացության մեջ հայտնված երիտասարդներին եւ զբաղվում նրանց կրթությամբ, հայկական կողմից՝ Հեծանվային սպորտի հայկական ֆեդերացիան եւ Հեծանվատուրիզմի եւ հեծանվավազքի հայկական ասոցիացիան:
Ֆրանսիայից ժամանած 27, Վանաձորի՝ 13 եւ Երեւանի 8 հեծանվորդներ հունիսի 8-19-ը կհաղթահարեն շուրջ 650 կիլոմետր՝ Երեւան-Բջնի-Լուսագյուղ-Վանաձոր-Կուրթան-Դսեղ-Մարգահովիտ-Ծաղկաձոր-Սեւան-Երեւան երթուղով:
Այսօր Հայաստանում Ֆրանսիայի արտակարգ եւ լիազոր դեսպան Անրի Ռենոն հյուրընկալեց վազքարշավի մասնակիցներին եւ հայաստանյան ԶԼՄ-ների ներկայացուցիչներին: «Ֆրանսիայից ժամանած հեծանվորդները, որպես կանոն, ինտերնատներում հանգրվանած պատանիներ եւ երիտասարդներ են: Կազմակերպիչների նպատակը նրանց ամառային արձակուրդներին բազմազանություն, ինչ-որ տեղ արկածային հովեր հաղորդելն է, ուրիշ երկրների երիտասարդներին հանդիպելն ու նրանց մշակույթին ծանոթանալը:
Կարդացեք նաև
«Tour de Armenie» անունը կրող այս մրցարշավի անցկացման ժամկետն էլ հաջող է ընտրվել, քանի որ վաղն ավարտվում է «Tour de France»-ի անգլիական փուլը եւ մասնակիցները կլինեն Ֆրանսիայում:
Այս մրցավազքը եւս մեկ անգամ գալիս է ամրապնդելու հայ-ֆրանսիական երկխոսությունը, որը սովորաբար պատկերացնում են որպես պատկան պատկառելի քաղաքական գործիչներ՝ անպայման պիջակով, փողկապով: Բայց այս անգամ մենք որոշեցինք փոխել ձեւաչափը: Տեսեք, մասնակից բոլոր երիտասարդները եկել են մարզահագուստով, որովհետեւ սա էլ հաղորդակցման, կապերի խորացման առհավատչյա է: Եվ նրանք ինչ տեսքով այստեղ ներկայացել են, վաղը պետք է գրոհեն Հայաստանյան լեռնաշխարհի տարբեր հատվածները: Եվ հայաստանյան այս շրջայցից հետո նրանք իրենց հերթին պետք է ստանձնեն փոքրիկ դեսպանների յուրահատուկ առաքելություն՝ Հայաստանը ներկայացնելու Ֆրանսիայում», – ասաց դեսպանը:
Աշոտ ՀԱԿՈԲՅԱՆ