Մեղրի քաղաքում փողոցների բարեկարգման, ճանապարհների ասֆալտապատման աշխատանքները շուտով ավարտին կհասցվեն: Այս մասին այսօր մեզ տեղեկացրեց Մեղրու քաղաքապետ Արշավիր Հովհաննիսյանը: Հիշեցնենք, որ Մեղրիում բարեկարգման աշխատանքներ էին մեկնարկել հունիսի 16-ին տեղացած հորդառատ տեղումներից հետո, երբ հողմախառն անձրեւը հեղեղել էր Մեղրի քաղաքի փողոցները, քանդել հենապատերը, վնասել միջհամայնքային ճանապարհները, ջրով ողողել բազմաբնակարան շենքերի առաջին հարկերը եւ այլն: Բնակիչների հողատարածքներին ու տներին հասցված վնասների վերաբերյալ մինչեւ օրս Մեղրու քաղաքապետարանը 90 դիմում է ստացել:
«Բոլոր դիմողներին նյութական աջակցություն կլինի` շինանյութ կհատկացվի, որպեսզի նրանք վերականգնեն վնասները: Մարզպետի միջնորդությամբ Քաջարանի կոմբինատը պատրաստակամություն է հայտնել աջակցել Մեղրիում իրականացվող վերականգնման աշխատանքներին եւ բավականին օգնություն է նախատեսել: Դիզվառելիք կտրամադրի նաեւ ճանապարհների նորոգման ու ասֆալտապատման աշխատանքներն իրականացնող «Մեղրու ճանշին» ընկերությանը, բնակիչներին շինանյութ կտրամադրվի փլված պատերը վերականգնելու համար եւ այլն», – տեղեկացրեց Մեղրու քաղաքապետը եւ ուրախությամբ նշեց, որ Մեղրին շուտով լիովին բարեկարգ տեսք կստանա:
Մերի ՍՈՂՈՄՈՆՅԱՆ
