«Անկեղծ ասած՝ այստեղ նաև անելիք ունեն հայազգի աշխարհահռչակ մտավորականները, ռուսաստանահայ գործարարները, ովքեր կարող են իրենց անունով միջնորդություն ներկայացնել Մոսկվայի դատարան՝ վերջինիս ազատ արձակելու և նախաքննության ավարտին տունը սպասելու համար: Այս առումով ինչ-որ արձագանքներ կան, բայց, իմ խորին համոզմամբ, բավարար չեն: Լևոն Հայրապետյանի ունեցած վաստակն ավելիին է արժանի»,- Aravot.am-ի հետ զրույցում նման կարծիք հայտնեց Սոցիալ Դեմոկրատ Հնչակյան կուսակցության Հայաստանի ատենապետ Նարեկ Գալստյանն՝ անդրադառնալով գործարար Լևոն Հայրապետյանի ձերբակալությանը:
Նարեկ Գալստյանը Լեւոն Հայրապետյանի հետ շփվել է մեկ անգամ՝ ընդհանուր միջավայրում: «Ինձ վրա թողել է բացառիկ ազգային մտածելակերպ ունեցող անձնավորության տպավորություն: Իհարկե, Հայրապետյանի ձերբակալությունը շատ մտահոգիչ է: Վերջինս մարմնավորում էր այն գործարարներին, ովքեր, իրենց միջոցները ստեղծելով արտերկրում, Հայաստանում և, մասնավորապես, Արցախում զբաղվում են իրական բարեգործությամբ, այլ ոչ թե իրենց անձի գովազդով»,- իր տպավորությունը փոխանցեց ՍԴՀԿ ատենապետը:
«Ես խոսել եմ Հայրապետյանի մտերիմների հետ, իրենք համոզված են, որ մեղադրանքները շինծու են, ուստի համոզված եմ այդ առումով նաև ես: Հույս ունենանք, որ Լևոն Հայրապետյանն օր առաջ կհայտնվի ազատության մեջ՝ հաշվի առնելով նաև նրա ծանր առողջական վիճակը»,- հավելեց նա:
Նելլի ԳՐԻԳՈՐՅԱՆ
