Լրահոս
Օրվա լրահոսը

«Չեմ կարծում, որ Լեւոն Հայրապետյանի գործին կարծիքները կվնասեն, եթե քաղաքական պատճառ չկա». Արմեն Մարտիրոսյան

Հուլիս 21,2014 17:33

Ինչպես տեղեկացրել ենք, հայ գործարար Լեւոն Հայրապետյանի մամլո ծառայությունը հաղորդագրություն էր տարածել՝ հորդորելով չքաղաքականացնել նրա հետ տեղի ունեցածը: Հաղորդագրության մեջ ասվում է, որ Լեւոն Հայրապետյանը ձերբակալվել է շինծու մեղադրանքների հիման վրա, որոնք իրականության հետ ոչ մի աղերս չունեն: Մոսկվայում Հայրապետյանի փաստաբանները խնդրել են Լեւոն Հայրապետյանի ձերբակալությունը չդարձնել Հայաստանի եւ Ռուսաստանի բարեկամության վրա ստվեր գցող երեւույթ, նրա վրա շինծու գործ կարողներին չնույնականացնել ՌԴ բարձրագույն իշխանության եւ ռուս ժողովրդի հետ եւ չքաղաքականացնել տեղի ունեցածը:

Լեւոն Հայրապետյանի ձերբակալությունը քաղաքական դրդապատճառների հետ էր կապել «Ժառանգության» փոխնախագահ Արմեն Մարտիրոսյանը:  Հուլիսի 21-ին Aravot.am-ի հետ զրույցում Արմեն Մարտիրոսյանը վստահեցրեց, որ կհարգի փաստաբանների այդ խնդրանքը:

Մեր հարցին՝ նման կարծիքները ինչքանո՞վ կարող են վնասել գործին՝ պարոն Մարտիրոսյանը պատասխանեց. «Չեմ կարծում, որ դրանք կվնասեն, եթե պատճառը քաղաքական չէ, արդար քննություն է ընթանում: Եթե քաղաքական պատճառ կա, հնարավոր է, որ վնասեն: Հակառակը չեմ ուզում պնդել, փաստաբաններն ավելի շատ ինֆորմացիա կունենան»:

Վարչապետ Հովիկ Աբրահամյանը Լեւոն Հայրապետյանի ձերբակալությանն անդրադարձել էր միայն իրավական տեսանկյունից եւ հայտարարել, որ «շատ շնորհակալ ենք բարերարներից, բայց եթե մարդիկ օրենք են խախտում, գնանք ասենք՝ մեր բարերա՞րն է»:

Հարցին՝ այս «ոչ քաղաքական» կարծիքը կարո՞ղ է ազդեցություն ունենալ գործի ընթացքի վրա՝ Արմեն Մարտիրոսյանը պատասխանեց. «Ես այլեւս չեմ ցանկանա շատ ծավալվել, եթե փաստաբանները նման հայտարարություն են տարածել, բայց խիստ կասկածելի է, որ նման բարեգործություն արած անձնավորությանը վարչապետը ոչ թե ասում է՝ մենք հնարավորինս հետամուտ կլինենք, որ արդար հետաքննություն լինի եւ այլն, այլ ասում է՝ դե որ օրենք է խախտել, ո՞նց չբռնեն: Դա խիստ կասկածելի է արդեն: Առավել եւս, որ վարչապետի ասածը անմեղության կանխավարկածն է խախտում»:

Արմեն Մարտիրոսյանն ասաց, որ Լեւոն Հայրապետյանն այն հասարակական գործիչներից է, որ իսկապես մեծ ծավալի աշխատանք է կատարել հայության համար, եւ հայությունը եւս պետք է բավականին աչալուրջ հետեւի այդ ամենին, նաեւ իշխանությունները:
Մեր հարցին՝ ասում են, որ Ռոբերտ Քոչարյանը եւ Լեւոն Հայրապետյանը մտերիմ ընկերներ են եղել, այս լռությունը Ռոբերտ Քոչարյանի կողմից ինչպե՞ս կմեկնաբանեք, նաեւ հաշվի առնենք, որ Գագիկ Ծառուկյանն էլ իր մամուլի ծառայության միջոցով իրավական օգնություն էր ուղղակի առաջարկել՝ Արմեն Մարտիրոսյանը պատասխանեց. «Մամուլի քարտուղարի կողմից հայտարարություն տարածելն էլ է պաշտոնական պատասխան: Ինչ վերաբերում է Ռոբերտ Քոչարյանին, ես չգիտեմ, թե նրանք ինչ հարաբերությունների մեջ են, ես անձնապես Լեւոն Հայրապետյանին չեմ ճանաչում, բայց արձագանք հատկապես Արցախից բուռն եղավ»:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2014
Երկ Երե Չոր Հնգ Ուրբ Շաբ Կիր
« Հուն   Օգո »
 123456
78910111213
14151617181920
21222324252627
28293031