Ազգային ժողովը ապրիլ ամսին որոշում էր ընդունել, որի համաձայն՝ Արարատյան դաշտի ոռոգման նպատակով Սեւանա լճի ջրի տարեկան բացթողումների քանակը սահմանվել էր 240 մլն խորանարդ մետր:
Բնապահպանները մտահոգություն ունեն, որ Ազգային ժողովը, առանց հանրային քննարկումներ իրականացնելու, կարող է բացթողումների քանակը ավելացնել եւ հասցնել տարեկան 270 մլն խորանարդ մետրի: Նրանց խոսքով՝ սոցհարցման արդյունքում Արարատի մարզի գյուղացիների մեծ մասը հայտնել են, որ որոշումը ընդունելուց հետո ջրի մատակարարման որակը բացարձակապես չի բարելավվել եւ գյուղացիները ոռոգման համար շարունակում են հորերից ջուր վերցնել:
Aravot.am-ը բնապահպան, Էկոլոգիական դաշինքի անդամ Արամ Գրիգորյանից եւ դաշինքի համակարգող Սիլվա Ադամյանից հետաքրքրվեց, ո՞ւր է գնում Սեւանից բաց թողնված ջուրը, եթե այն չի հասնում Արարատյան դաշտավայր:
Սիլվա Ադամյանը վստահեցնում է, որ գյուղացիների խոսքով՝ իրենք ջուր չեն ստանում եւ շարունակում են հորերից օգտվել: Նա վստահեցնում է. «Ակնհայտորեն, Սեւանա լճի ջուրը չի հասնում Արարատյան դաշտ: Ջուրը ուղղակի գնում է»:
Կարդացեք նաև
Նա վստահեցնում է, որ ջուրը բաց են թողնում միայն մի նպատակով. «Որպեսզի իրենց շքեղ հյուրանոցները, զվարճանքի վայրերը չմնան ջրի տակ»: Նրա ներկայացմամբ՝ ջուրը գնում է դեպի Արաքս, որն էլ գնում է դեպի Ադրբեջան՝ Կասպից ծով:
Արամ Գրիգորյանի ներկայացմամբ էլ, բաց թողնված ջուրը պետք է ջրանցքներով գար, որպեսզի գյուղացիները կարողանային օգտվել դրանից եւ ոռոգեին. «Գյուղացին ասում է՝ ես դրանից չեմ օգտվում: Դա Սեւանի ջուրը չէ: Դա ընդերքի ջուրն է»:
Պրն Գրիգորյանի խոսքով՝ խնդիրը կառավարման համակարգի մեջ է. «Կառավարման համակարգում ջրօգտագործողների միություն ենք հնարել, որոնք պետք է այդ ջուրը տեղ հասցնեն գյուղացուն: Այստեղ էլ ջրի ծավալների եւ ՋՕՄ-երին տրված գումարների խնդիր կա, քանի որ դա էլ գյուղացուն ձեռք չի տալիս: Նա ասում է՝ ավելի լավ է ես փորեմ, ջուրը ընդերքից հանեմ, քան գումար վճարեմ»:
Էլյա ՀՈՎՀԱՆՆԻՍՅԱՆ
