Aravot.am-ի հետ զրույցում Լեռնային Ղարաբաղի առողջապահության նախարար Հարություն Քուշկյանն ասաց, որ Քաշաթաղում ականի պայթյունից վիրավորված ՀՀ քաղաքացիներին Արցախի շտապօգնության 2 բրիգադ անմիջապես տեղափոխել է շրջանային հիվանդանոց, որտեղ առաջին բուժօգնությունն են ցուցաբերել:
Պարոն Քուշկյանի խոսքերով` առաջին բուժօգնությունից հետո, ԼՂՀ կառավարության աջակցությամբ, ՀՀ քաղաքացիներին ուղղաթիռով տեղափոխել են Երեւան` «Էրեբունի» բժշկական կենտրոն:
Նշենք, որ դեպքը տեղի է ունեցել առավոտյան ժամը 6:15-6:30-ի սահմաններում: Ավտոմեքենայի պայթյունից տուժել են ՀՀ 3 քաղաքացիներ, որոնցից մեկը Արմավիրի քաղաքապետ Ռուբեն Խլղաթյանն է, իսկ մեքենայի վարորդը մահացել է:
Տուժածներն այս պահին «Էրեբունի» հիվանդանոցի վերակենդանացման բաժանմունքում են:
«Էրեբունի» բուժկենտրոնից մեզ հայտնեցին, որ պայթյունից տուժածներից մեկին` Գառնիկ Ավետիսյանին, որը սրունքի բաց կոտրվածք է ստացել, այս պահին վիրահատում են, մյուս տուժածը` Արթուր Բաղդասարյանը ողնաշարի կոտրվածք ունի, սակայն նրան առայժմ չեն վիրահատի: Իսկ Արմավիրի քաղաքապետ Ռուբեն Խլղաթյանին, ինչպես հայտնել են ավելի վաղ, վիրահատել են ձեռքի 5-րդ կոտրված մատը:
Կարդացեք նաև
Նելլի ԲԱԲԱՅԱՆ
Լուսանկարը՝ moh.nkr.am-ից
