«Ամեն ինչ կախված է նրանից՝ արդյոք շատ կարճ ժամանակում կունենանք Արեւմուտքի կոնսոլիդացիա»,- Aravot.am-ի հետ զրույցում ասաց «Կովկաս» ինստիտուտի փոխտնօրեն Սերգեյ Մինասյանն՝ անդրադառնալով մալազիական Բոինգի կործանումից հետո աշխարհում ստեղծված իրավիճակին:
Եթե ռուսական կողմին հաջողվի որոշակիորեն լիցքաթափել զգացմունքային մոտեցումը, ըստ քաղաքագետի, դա կարող է հանգեցնել Ռուսաստանի հանդեպ դիրքորոշման որոշակի կոշտացման, բայց առանց առանձնահատուկ քայլերի:
«Բայց եթե շատ կարճ ժամանակում մենք ականատեսը լինենք նորանոր քայլերի, ապա, հակառակը, դա կարող է բերել Ուկրաինային Արեւմուտքի կողմից ավելի հստակ աջակցության: Ընդհուպ, մինչեւ մեծ քանակությամբ ռազմական տեխնիկայի եւ զենքի տրամադրման»,- ասաց քաղաքագետը՝ հավելելով, որ դրան պետք է հետեւի նաեւ ՌԴ-ի նկատմամբ նոր տնտեսական պատժամիջոցների կիրառումը:
Քաղաքագետի գնահատմամբ, եթե Արեւմուտքը կարճ ժամանակահատվածում, ասենք, մեկ շաբաթվա ընթացքում, չգնա կտրուկ քայլերի, ապա ՌԴ-ի նկատմամբ տնտեսական պատժամիջոցների խստացումը չի հանգեցնի այն արդյունքին, ինչն այս պահին ակնկալում են Արեւմուտքում կամ Ուկրաինայում:
Կարդացեք նաև
Նելլի ԳՐԻԳՈՐՅԱՆ
