Լրահոս
Օրվա լրահոսը

«Քո լրագրողական կարիերան պետք է սկսես բաց աչքերով»

Հուլիս 24,2014 13:55

Գիրք, որը պետք է կարդա ամեն սկսնակ լրագրող

Մի բան է, երբ տեսաբանն է լրագրություն դասավանդում, եւ մեկ այլ, երբ դա անում է գործող լրագրողը. այս դեպքում դասերն ավելի «ապրված են» ու ավելի պետքական: Մամուլում երկարամյա աշխատանքի հարուստ փորձ ունեցող, իսկ այժմ «Երկիր Մեդիա» հեռուստաընկերության «Երկիրն այսօր» լրատվական թողարկման գլխավոր խմբագիր Ռուզան Խաչատրյանի «Սկսնակ լրագրողի գիրքը», որը «Անտարես» հրատարակչությունը հրապարակել է վերջերս՝ հենց երկրորդ դեպքն է:

«Ուզում եմ իմանաս, թե իրականում ինչ է պահանջվում սկսնակ լրագրողից»,- նախաբանում իր սկսնակ գործընկերներին ասում է Ռուզան Խաչատրյանը ու քայլ առ քայլ նրանց ուղեկցում լրագրական աշխարհ: Լրագրողական սկզբունքներից բացի, որոնք գուցե առկա են այլ դասագրքերում՝ այստեղ բազմաթիվ խորհուրդներ կան, որ դժվար թե գտնես որեւէ այլ տեղ՝ աշխատանքային պայմանագրեր ու վճար, հագուկապ ու լրագրողական տեխնիկա եւ այլն:

«Քո լրագրողական կարիերան պետք է սկսես բաց աչքերով»,- գրում է հեղինակը, ու թեեւ տվյալ դեպքում ասվածը վերաբերում է նրան, որ լրագրողը պետք է իմանա լրատվությանն առնչվող օրենքները՝ կարծում ենք, համատեքստն իրականում ավելի լայն է:
Եվս մի մեջբերում անենք Ռուզան Խաչատրյանի խորհուրդներից: «Ուսանողին կամ աշխատանքի նոր ընդունված լրագրողին ոչ մի խելոք խմբագրապետ շատ կարեւոր միջոցառում լուսաբանելու չի ուղարկի: Դու դեռ պիտի վստահություն ձեռք բերես, որ հատկապես բարեխղճորեն ես վերարտադրում տեղի ունեցածը կամ հնչած խոսքը եւ անտեղի հերոսանալու մարմաջ չունես: Հավանաբար, քեզ ավելի շատ կուղարկեն մշակութային, երիտասարդական կամ սոցիալական միջոցառումներ լուսաբանելու: Մի նեղվիր, թեմաների կամ վճարման համար խանդի տեսարաններ մի սարքիր, դա լրագրողին վայել չէ՝ ոչ աշխատանքի առաջին տարիներին, ոչ էլ երբեւէ»:

Մնացածը անպայման արժե կարդալ «Սկսնակ լրագրողի գրքում», որը վաճառվում է «Հայգիրք» եւ «Նոյյան տապան» գրախանութներում:

«Առավոտ» օրաթերթ
23.07.2014

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2014
Երկ Երե Չոր Հնգ Ուրբ Շաբ Կիր
« Հուն   Օգո »
 123456
78910111213
14151617181920
21222324252627
28293031