Հայաստանում ԱՄՆ դեսպանությունը Ֆեյսբուքի իր էջում հրապարակած հաղորդագրության մեջ անդրադարձել է դեպի Հայաստան օդային թռիչքների անվտանգության վերաբերյալ հարցերին:
Aravot.am-ը քաղաքագետ Ռուբեն Մեհրաբյանին խնդրեց մեկնաբանել, արդյոք այդ գրառման ուղերձն այն չէ՞, որ Ռուսաստանի դեմ սկսված պատժամիջոցները այլեւս անդրադառնում են ռուսամետ Հայաստանի վրա: «Ես նման տպավորություն չստացա, որ դա կապ ունի Ռուսաստանի նկատմամբ պատժամիջոցների հետ, խոսքը վերաբերում է թռիչքների անվտանգությանը, որովհետեւ, Հայաստանից դեպի Հյուսիս ընկած հատվածը վտանգ է իրենից ներկայացնում, քանի որ մենք տեսանք, որ ռուսամետ տեռորիստները այնտեղ զբաղված են ինքնաթիռներ խփելով: Եվ առանձնապես խելքներին զոռ չեն տալիս, թե ինչ են խփում, դա էլ հենց առիթ է տալիս մտահոգվել անվտանգությամբ, ինչն էլ գրված է դեսպանատան հաղորդագրության մեջ»,-նշեց քաղաքագետը:
Մեր ճշտող հարցին՝ փաստորեն, իր կարծիքով Հայաստանի հետ կապված, որեւէ ենթատեքստ չկա, Ռուբեն Մեհրաբյանը պատասխանեց. «Ո՛չ, կարծում եմ, որ սա այդ դեպքը չէ»:
Հավելենք, որ ԱՄՆ դեսպանատան հաղորդագրության մեջ նշված էր՝ «Ամերիկայի քաղաքացիները, ովքեր ճանապարհորդելու են Ռուսաստանի Դաշնություն, պետք է տեղյակ լինեն, որ Պետդեպարտամենտը հրապարակել է ճամփորդական զգուշացում Ռուսաստանի համար:
Կարդացեք նաև
ԱՄՆ քաղաքացիներին, ովքեր այցելելու են կամ բնակվում են Հայաստանում, խրախուսում ենք գրանցվել Պետդեպարտամենտի խելամիտ ճանապարհորդների գրանցման STEP ծրագրում , որը Ձեզ հնարավորություն է տալիս ստանալ Պետդեպարտամենտի անվտանգության զգուշացումները և մոտակա ԱՄՆ դեսպանատանը կամ ԱՄՆ հյուպատոսությանը հնարավորություն է տալիս կապվել ձեր հետ արտակարգ իրավիճակներում: Եթե դուք ինտերնետ կապ չունեք, ապա պարզապես գրանցվեք մոտակա ԱՄՆ դեսպանատանը կամ հյուպատոսարանում»:
Գոհար ՀԱԿՈԲՅԱՆ
