Երեկ` հուլիսի 24-ին, քաղաքացիական ակտիվիստ Վաղինակ Շուշանյանը հրավիրվել էր Ազգային անվտանգության ծառայություն, եւ այսօր էլ ներկայացավ:
Aravot.am-ի հետ զրույցում Վաղինակ Շուշանյանը նշեց, որ ԱԱԾ հրավիրվելու պատճառը հուլիսի 1-ին Հանրային ծառայությունները կարգավորող հանձնաժողովի շենքում տեղի ունեցած նիստի ընթացքում արած հայտարարությունն էր` «Ես այդ 4 դրամը չեմ վճարի, եթե պետք եղավ ահաբեկչություն էլ կանեմ».«Երբ ես ներսում էի` որպես հանրության կողմից մասնակից, տեղի էր ունենում անհասկանալի մի բան` բուն թեման թողած անձնական վիրավորանքների էին անցել մասնակիցները, ես էլ բարկացա ու տաքացած վիճակում նման բան ասացի: Ես դա ի նկատի չունեի: Ես ինքս պայքարում եմ անօրինությունների ու ապօրինությունների դեմ, ինչպե՞ս կարող եմ նման բան անել իմ հայրենիքում, բացառվում է»:
Նա նշեց, որ ԱԱԾ-ում իրեն բարեկիրթ ձեւով բացատրեցին, որ նման արտահայտություններ անել չի կարելի` մարդիկ կարող են իրենից օրինակ վերցնել: Ակտիվիստը համարում է, որ նման դեպքեր չեն լինի, ուղղակի սա ԱԱԾ-ի կողմից զգուշացման նման մի բան էր.
«Ասացին, որ ինձ ակամայից շատ լավ ճանաչում են ու գիտեն, որ ես նման բան անող չեմ, ուղղակի որոշ մարդիկ կարող են դրանից առիթավորվել, թե տեսեք Վաղինակն ասաց ու անպատիժ մնաց, ուրեմն` ես էլ կարող եմ ասել կամ անել»:
Ամի ՉԻՉԱԿՅԱՆ
Կարդացեք նաև
Լուսանկարը` Վաղինակ Շուշանյանի ֆեյսբուքյան էջից
