Լրահոս
Օրվա լրահոսը

Աննա Իսրայելյան. «Այս աշխատանքը ստիպում է, որ մնացած ամեն ինչը ստորադասես իրեն»

Հուլիս 27,2014 20:05

Հոբելյանների առիթով ընդունված է միայն լավ բաներ ասել: Սակայն լրագրողի աշխատանքը ոչ միշտ է տոնական, ավելի ստույգ՝ գերազանցապես տոնական չէ:

Այս աշխատանքն ամուր նյարդեր է պահանջում, քանի որ սթրեսներն ամեն քայլափոխի են՝ նյութի առնչությամբ հաշիվ պարզողներ, ոստիկանների հետ բախումներ, մարդկային ողբերգական ճակատագրեր եւ այլն: Սա՝ գրեթե ամենօրյա ռեժիմով: Իմ լրագրողական գործունեության ընթացքում եղել է շատ ավելին, ու բարձրակետը 1999-ի հոկտեմբերի 27-ին Ազգային ժողովում իրականացված ահաբեկչությունն էր, երբ դեռ ուշքի չեկած կրակահերթերից եւ արյունոտ տեսարաններից՝ ձայնագրությունս էի վերծանում ու ամեն անգամ վերստին ցնցվում՝ կրակահերթերի ձայներն այնտեղ լսելով:

Այս աշխատանքը ստիպում է, որ սկսես հասկանալ չինովնիկներին, թե ինչու են նրանք պատսպարվում ընդունարաններում ու քարտուղարուհիների հետեւում: Քանի որ լրագրողի դուռը բաց է, եւ ամեն մեկը, երբ սիրտն ուզի՝ որոշում է գալ, կյանքը պատմել եւ ակնկալել, որ լուծելու ես իր խնդիրները:

Այս աշխատանքը ստիպում է, որ մնացած ամեն ինչը ստորադասես իրեն: Իմ որդու առաջին խաղերից մեկը «միկրոֆոնը տուր՝ հարցազրույց անեմ»-ն էր; «Առավոտի» այլ թղթակիցներ այժմ պատմում են, որ իրենց զավակները թխթխկացնում են խաղալիք համակարգչի վրա ու լուրջ-լուրջ ասում՝ «Մի խանգարի, նյութ եմ գրում, խմբագրությունում ինձ են սպասում»:

Այս աշխատանքը ստիպում է, որ զանց առնվեն «Աշխատանքային օրենսգրքի» շատ դրույթներ՝ մասնավորապես աշխատաժամանակի եւ հանգստյան օրերի մասին: Օր է եղել, երբ խմբագրությունից տուն եմ վերադարձել գիշերվա ժամը երեքին՝ Լեւոն Տեր-Պետրոսյանի հրաժարականից հետո, իսկ օր է եղել անգամ, որ լուսադեմին:

Եվ վերջապես՝ այս աշխատանքը ստիպում է, որ մոռանաս ոտքերի հոգնածության մասին, մոռանաս ցրտի մասին ու միայն փորձես չդադարեցնել աշխատելը: Այս լուսանկարը մեկն է նման պահերից՝ հանրահավաքում լրիվ թրջված, սառած, բայց ձայնագրիչը ձեռքումս:

«Առավոտ» օրաթերթ
26.07.2014

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2014
Երկ Երե Չոր Հնգ Ուրբ Շաբ Կիր
« Հուն   Օգո »
 123456
78910111213
14151617181920
21222324252627
28293031