Քիչ առաջ Շիրակի մարզի ընդհանուր իրավասության դատարանի նախագահ Էդուարդ Մանուկյանը, քննելով ռազմական ոստիկանության քրեական հետախուզության Գյումրու բաժանմունքի պետի` 36-ամյա Արման Կատունյանի խափանման միջոցի հարցը, որոշեց նրան երկամսյա կալանքի ենթարկել:
Հիշեցնենք, որ ռազմական ոստիկանության պաշտոնյան կասկածվում է Գյումրու մանկավարժական ինստիտուտի ռեկտոր Վարդևան Գրիգորյանի 50-ամյա եղբորը` Հարություն Գրիգորյանին սպանելու մեջ:
Արման Կատունյանի փաստաբան Երվանդ Վարոսյանը Aravot.am-ին փոխանցեց, որ իր պաշտպանյալին այսօր մեղադրանք է առաջադրվել ՀՀ Քրեական օրենսգրքի 104 հոդվածի 1-ին մասով և 235 հոդվածի 1-ին մասով: Սակայն նա իրեն մեղավոր չի ճանաչել և ցուցմունքներ չի տվել: Երվանդ Վարոսյանը նաև փոխանցեց, որ իրենք բողոքարկելու են Արման Կատունյանի նկատմամբ որպես խափանման միջոց երկամսյա կալանքի ենթարկելու դատարանի որոշումը:
Քանի որ շրջանառվող վարկածի համաձայն Հարություն Գրիգորյանի սպանության պատճառը Արման Կատունյանի կինն է, Aravot.am-ը փաստաբան Երվանդ Վարոսյանից հետաքրքրվեց` ճշմարտությունը բացահայտելու նպատակով արդյք բերման կենթարկե՞ն վերջինիս, որն այս պահին Հայաստանում չէ, ըստ Գյումրում տարածված տեղեկությունների, ՌԴ-ում է: Երվանդ Վարոսյանն ասաց, որ բերման ենթարկելու հիմք այս պահին չկա, սակայն, ըստ նրա, Կատունյանի տիկինը որպես վկա կընդգրկվի գործում:
Կարդացեք նաև
Նունե ԱՐԵՎՇԱՏՅԱՆ
