Ազգային անվտանգության հարցերով նախագահի նախկին խորհրդատու
Գառնիկ Իսագուլյանի համոզմամբ՝ ստվերի դեմ կառավարության կողմից
պայքար սկսվելուց հետո Հայաստանում ստվերն ավելի է մեծացել:
– Լրացավ վարչապետ Հովիկ Աբրահամյանի գործունեության 100 օրը: Ինչպե՞ս կգնահատեք վարչապետի աշխատանքը:
– Անկեղծ ասած՝ ցանկացած գործունեություն գնահատելու համար անհրաժեշտ են չափորոշիչներ, որոնք առկա են ի սկզբանե, այն է` նախորդ կառավարության գործունեության ժամանակներից սկսած, կամ էլ դրանք պետք է ձեւավորվեին նոր կառավարության գործունեության հենց սկզբում: Նման չափորոշիչներ չկան, իսկ այլ առումներով ուղղակի լրատվամիջոցներում այժմ ավելի քիչ է հնչում Տիգրան Սարգսյանի անունը. ուրիշ ոչինչ, ըստ էության, չի փոխվել:
– Արդեն 1,5 ամիս է, ինչ կառավարությունն իրագործում է ստվերի դեմ պայքարի իր ծրագիրը: Վերջերս թվային ցուցանիշներ հրապարակվեցին, համաձայն որոնց՝ գործարարությամբ զբաղվող տարբեր մանր ու միջին ընկերություններ 1-4 միլիոն դրամով ավելի բյուջետային մուտքեր կապահովեն: Դա բավարա՞ր դրական քայլ եք համարում:
Կարդացեք նաև
– Ստվերի դեմ պայքարի ցանկացած ձեւ ու միջոց երբեւէ արդյունավետ չի կարելի համարել, եթե դա տեսանելի չէ ՀՀ շարքային քաղաքացուն: Իսկ այն թվերը, որոնց մասին խոսում են, ստվերի հետ համեմատած՝ ոչ միայն ծիծաղելի են, այլեւ նշանակում է, որ ստվերը Հայաստանում ավելի է մեծացել: Այնպես որ՝ եկեք այդ թեման համարենք Հայաստանում անձեռնմխելի, քանի դեռ չի իրականացվել համակարգային փոփոխություն:
– Վարչապետին վրդովեցրել էր դիտարկումը, որ հարկային բեռը կրկին մանր ու միջին բիզնեսի ուսերին է ծանրացել: Իր ընդդիմախոսներին վարչապետը մեղադրել էր դատարկախոսությամբ զբաղվելու մեջ: Գուցե իսկապե՞ս կառավարությունն իրեն կոտորում է աշխատելով, իսկ «որոշ օպոնենտներ», ինչպես Հովիկ Աբրահամյանն էր ասել, դատարկաբանությամբ են զբաղված:
– Կոտորվելով աշխատելու փոխարեն ուղղակի հարկավոր է աշխատել արդյունավետ, իսկ արդյունավետ աշխատելու համար մարդն առնվազն պետք է լինի իր գործի գիտակը: Ինչպես Սոդոմ Գոմորը կործանելուց առաջ ասվեց` եթե թեկուզ երեք հավատավոր մարդ լինի, ապա Սոդոմ Գոմորը կործանումից փրկել կարելի է. նույն կերպ ցույց տվեք կառավարության մեջ երեք գիտակ մարդ, եւ ես կասեմ` այս կառավարությունն ինչ-որ բան կարող է անել:
– Տեսնո՞ւմ եք քայլեր, որոնք անում է ՀՀ կառավարությունը, որպեսզի ՌԴ-ի դեմ Արեւմուտքի պատժամիջոցների ազդեցությունը Հայաստանի վրա հնարավորինս մեղմ լինի:
– Ես այդ հարցերը միմյանց հետ կապելու որեւէ նախապայման չեմ տեսնում: Եվ ընդհանրապես՝ չեմ կարծում, որ Հայաստանի փոխհարաբերությունները` թե տնտեսական, թե քաղաքական առումներով, առնչվում են երրորդ կողմին, եթե նման ցանկություն չի դրսեւորում ինքը` Հայաստանը, իր քաղաքական ու տնտեսական սխալ քաղաքականությամբ:
– Ձեր կարծիքով՝ ինչո՞ւ է ձգձգվում Հայաստանի՝ Եվրասիական տնտեսական միությանն անդամակցության հարցը: Այդ ձգձգումը Հայաստանում ներքաղաքական խժդժությունների պատճառ կարո՞ղ է դառնալ:
– Մեր շրջադարձը եվրաինտեգրումից դեպի ԵՏՄ կատարվեց շատ կտրուկ եւ անսպասելի, իսկ ընթացքը դեպի ԵՏՄ այնքան արագ էր, որ մենք վազանց կատարեցինք, այժմ ժամանակ է պետք, որ ետ գանք: Ուղղակի պետք է այնպիսի տեմպ որդեգրել, որ հիմա էլ հակառակը չստացվի: Իհարկե, պատասխանս գուցե մի փոքր տարօրինակ թվա, բայց հավատացեք, որ հիմնական պատճառը դա է:
– Կիսո՞ւմ եք առաջին նախագահի այն կարծիքը, որ հարցը ձգձգվում է ՀՀ իշխանությունների` Հայաստանի եւ Ղարաբաղի սահմանին մաքսակետ դնելու հարցում չկողմնորոշվածության պատճառով:
– Ես վստահաբար կարող եմ ասել, որ երբեւէ Հայաստանի առաջ նման նախապայմաններ չեն դրվել, չեն դրվում եւ չեն էլ դրվելու, եթե մենք ինքներս ցանկություն չունենանք նման խնդիրների առաջադրման` այլ-այլ հարցեր լուծելու համար: Կարծում եմ՝ պետք է քննության ենթարկել այն հանգամանքը, թե արդյոք մեր իշխանություններն իրենք ցանկություն ունեցե՞լ են, որ Հայաստանի դեմ նման պայմաններ առաջադրվեն: Այդ իսկ պատճառով չեմ ցանկանում մեկնաբանել ՀՀ առաջին նախագահ Լեւոն Տեր-Պետրոսյանի միտքը, քանզի չգիտեմ, թե նա ի՞նչ է ի նկատի ունեցել, երբ ասել է, որ Հայաստանի իշխանությունները կանգնած են նման երկընտրանքի առաջ:
Զրույցը՝ ՆԵԼԼԻ ԳՐԻԳՈՐՅԱՆԻ
«Առավոտ» օրաթերթ
30.07.2014
