Ազգությամբ քուրդ, Թուրքիայի նախագահի թեկնածու Սելահադդին Դեմիրթաշը խոսք է տվել՝ ընտրվելու դեպքում ճանաչել Հայոց ցեղասպանությունը և ամեն տարի ապրիլի 24-ին հիշեցնել հայերի դեմ կատարված ոճրագործության մասին, գրում է «Հաքքին.ազ»-ը:
«Ես մարդու իրավունքների պաշտպան եմ, երկար տարիներ է՝ դրանով եմ զբաղվում: Եվ արդեն 8 տարի է՝ ես քաղաքականության մեջ եմ: Քաղաքականությամբ ես հետաքրքրվում էի, երբ դեռ ուսանող էի ու միշտ համարել եմ, որ այն, ինչ տեղի է ունեցել հայերի հետ, իսկական ցեղասպանություն է», – ասել է նա «Ակօս» շաբաթաթերթին տված հարցազրույցում՝ նշելով, որ 1915թ. դեպքերը հայերի նկատմամբ կազմակերպված կոտորած էր, որը հայերին բնաջնջելու քաղաքական ծրագիր էր:
Դեմիրթաշն ասել է, որ ով պատրաստվում է իրեն ձայն տալ, պետք է իմանա, որ 1915թ. դեպքերը ինքը ճանաչում է որպես ցեղասպանություն և ամեն տարի ապրիլի 24-ին նա իր պարտքն է համարելու հիշել հայերի դեմ կատարված ողբերգությունը:
Թուրքիայի նախագահի ընտրությունները կայանալու են օգոստոսի 10-ին: Առաջին անգամ երկրի առաջնորդին ընտրելու է ժողովուրդը, ոչ թե խորհրդարանը:
Կարդացեք նաև
Պատրաստեց Հովհաննես ԻՇԽԱՆՅԱՆԸ