«Մենք՝ հաշմանդամներս, պահանջում ենք վերականգնել փոխհատուցման վճարումը»,- այսօր` օգոստոսի 21-ին, Aravot.am-ի հետ զրույցում հայտարարեց նախկին ավիատեխնիկ, բրիգադիր Վանիկ Մաիլյանը:
Նա նշեց, որ օդաչուները պետական առաջադրանք կատարելիս տարիների ընթացքում հաշմանդամ են դարձել: Բացառություն չէ նաեւ ինքը: Վերջինս ստացել է 2-րդ կարգի հաշմանդամություն.
«Ինքնաթիռի վրա աշխատանք կատարելու ժամանակ աստիճանից ցած եմ ընկել, գլուխս երկու անգամ վիրահատել եմ, որից հետո էպիլեպսիա է առաջացել ինձ մոտ, 10 տարի Մոսկվայում եմ բուժվել, որից հետո հիշողությունս կորցրել եմ, գլխապտույտներ ունեմ: Այն օդաչուները կամ ավիատեխնիկները, ովքեր պետական առաջադրանքներ կատարելու տարիների ընթացքում հաշմանդամ են դարձել, պետությունը պարտավոր է նրանց տեր կանգնել եւ փոխհատուցել»:
Նրա խոսքերով` 2006 թվականի սեպտեմբերի 1-ին արգելել են փոխհատուցման վճարումը, արդյունքում` 120-ից ավելի հաշմանդամ նախկին օդաչուներից կենդանի են մնացել միայն 55-ը.
«Մարդիկ մահացել են, մարդիկ փող չունեն, որ դեղորայք գնեն: Մենք` հաշմանդամներս, սովետական կարգերի օրոք ստացել ենք փոխհատուցում, Հայաստանը դարձել էր առանձին հանրապետություն, ստանում էինք փոխհատուցում»:
Անդրադառնալով` երեկ` օգոստոսի 20-ին, կառավարության աշխատակազմի ղեկավար-նախարար Դավիթ Հարությունյանի հետ հանդիպմանը` պարոն Մաիլյանը նշեց, որ իրեն ներկայացրել են հաշմանդամ օդաչուների խնդիրներն ու պահանջները, վերջինս էլ նշել է, որ կծանոթանա մանրամասներին եւ հաջորդ շաբաթ կտեղեկացնի իրենց, թե ինչո՞վ կարող է օգնել:
Օդաչու հրամանատար Սեյրան Սարգսյանը մեզ հայտնեց, որ երեկ Դավիթ Հարությունյանը 4 հաշմանդամ օդաչուի է ընդունել.
«Որոշեցին Սեւանում 11 հա հող վաճառել, դրանից հետո տեսնենք, թե ինչպե՞ս կլինի: Իհարկե’, հաճելի կլիներ, որ օրենքների վրա աշխատեն: Օրենք պետք է ընդունվի այն անձերի համար, որոնք աշխատանքային գործընթացում հաշմանդամ են դարձել կամ զոհվել են»:
Կարդացեք նաև
Ամի ՉԻՉԱԿՅԱՆ
