Ադրբեջանի Ազգային ճակատ կուսակցության անդամ Ռասուլ Մուրսալովը, որի դեմ քրեական գործ է հարուցվել հայերի հետ հանդիպելու համար, ապաստանել է Վրաստանում գտնվող դեսպանատներից մեկում, այդ մասին հայտնել է Մուրսալովը: Փոխանցում է «Հաքքին.ազ»-ը՝ հղում անելով «Ենի Մուսավաթ»-ին:
Նրա նկատմամբ գործ է հարուցվել «հայրենիքի դավաճանության» և «խարդախության» հոդվածներով:
«Դավաճանության» գործի համար հիմք է հանդիսացել օգոստոսի 1-4-ը Վրաստանում տեղի ունեցած միջազգային ծրագրի շրջանակներում հայերի հետ հանդիպելը, իսկ «խարդախության» համար՝ ադրբեջանական բանկերից մեկից 2008թ.-ին վարկ վերցնելը:
«Իմ դեմ «հայրենիքի դավաճանության» մեղադրանքով գործ են հարուցել՝ հիմք ընդունելով Վրաստանում օգոստոսի 1-4-ը տեղի ունեցած միջոցառման շրջանակում հայերի հետ ունեցած հանդիպումներս: Այնտեղ մենք հայերի հետ քննարկում էինք Ղարաբաղի հակամարտությունը խաղաղ ճանապարհով կարգավորելու հարցերը», – ասել է նա՝ ավելացնելով, որ եթե նա վերադառնա Ադրբեջան, ապա նրան ցմահ ազատազրկում է սպառնում:
Կարդացեք նաև
«Անվտանգության նկատառումներից ելնելով՝ ես չեմ կարող բացահայտել գտնվելու վայրս: Ես ապաստանել եմ արտերկրյա դեսպանատներից մեկում: Հնարավոր է՝ Եվրոպա մեկնեմ», – ասել է Մուրսալովը:
Պատրաստեց Հովհաննես ԻՇԽԱՆՅԱՆԸ
