Սյունիքի մարզ այցելող զբոսաշրջիկների թիվը թեեւ տարեցտարի ավելանում է եւ Տաթեւը Հալիձորին կապող ճոպանուղի նստողների թվի աճ է գրանցվում ամեն տարի, բայց գյուղացիների պատմելով` Հալիձոր գյուղում շատ քիչ թվով զբոսաշրջիկներ են կանգ առնում:
Հալիձորի գյուղապետ Մարատ Գերասիմյանի փախանցմամբ` 120 տնտեսություն ունեցող գյուղում ընդամենը 2 հյուրատուն է գործում եւ եւս 4 տուն էլ հնարավորություն ունի հյուրեր ընդունելու, իսկ մյուս բնակիչները հետաքրքրված չեն զբոսաշրջիկներ հյուրընկալելով:
«Գյուղապետարանը, «Տաթեւի վերածնունդ» հիմնադրամը պատրաստ են նման հարցերով միշտ սատար կանգնել, ուղղակի մեր բնակիչների կողմից նախաձեռնությունները քիչ են: Չեն մտածում, որ կարող են զբոսաշրջիկներին հյուրընկալելով, մշակութային վայրեր ցույց տալով, կավ թրծելով, լավաշ թխելով կամ ավանդական ուտեստներ հյուրասիրելով եւ տարբեր ցուցահանդես կազմակերպելով եկամուտ ստանալ: Մարդկանց մտածելակերպը պետք է փոխել: Դեռ նոր է տեղից շարժվում այդ հետաքրքրությունը: Իհարկե, ֆինանսի բացակայությունն էլ է խանգարում, որ մարդիկ կարողանան իրենց տները կարգի բերել, բայց դա երկրորդական է, հիմնականում իրենց մտածելակերպի հարցն է…», – հավաստիացրեց Հալիձորի գյուղապետը եւ հավելեց, որ Հալիձորը հարուստ պատմամշակութային ժառանգություն ունի եւ զբոսաշրջիկներին կարող է գրավել իր տեսարժան վայրերով:
Գյուղից 2 կմ դեպի հարավ-արևմուտք նշանավոր Հարանց Անապատն է գտնվում, իսկ շրջակայքում «Խաչին խութ» կոչվող եկեղեցին, «Հին Հալիձոր» գյուղատեղին, «Պողոց-Պետրոս» մատուռը, ինչպես նաև բազմաթիվ խաչքարերով գերեզմանոցը։
Կարդացեք նաև
Որոտանի ձախ ափին, այգիների մեջ պահպանված է ժայռաբեկորի վրա կանգնեցված 1265թ. կալվածագիր արձանագրությունը։
««Տաթեւի վերածնունդ» հիմնադրամը եւս հետաքրքրված է զարգացնելու Հալիձորի հին գյուղատեղին, գյուղացիների հետ տարբեր քննարկումներ ենք անում, որպեսզի մեր տարածքում խթանենք զբոսաշրջության զարգացմանը: Մտադիր ենք գյուղում շուկա ունենալ, որտեղ վաճառքի կհանվի տեղական արտադրանքը:
Անցած տարի մեր այս ընդհանուր տարածաշրջան 250 հազար զբոսաշրջիկ է այցելել, որից կեսը մեր տարածքով է անցել, բայց այս պահին այդ կեսի 10 տոկոսն էլ չենք կարողանում մեր գյուղ բերել», -ավելացրեց Մարատ Գերասիմյանը եւ հույս հայտնեց, որ որոշ ժամանակ անց Հալիձորը եւս զբոսաշրջային կենտրոն կդառնա, քանի որ բազմաթիվ ծրագրեր են մշակում այդ ուղղությամբ:
Մերի ՍՈՂՈՄՈՆՅԱՆ
