ՀՀ էներգետիկայի եւ բնական պաշարների նախարար Երվանդ Զախարյանը տարածքներ օտարելու հետ մեծ սեր ունի. եթե Երեւանի քաղաքապետ եղած ժամանակ պարոն Զախարյանը որպես բացառիկ հանրային գերակա շահ տարածքներ էր օտարում մայրաքաղաքի կենտրոնում, ապա որպես նախարար մտադիր է տարածքներ օտարել ամբողջ հանրապետությունով մեկ:
Շուրջ 43 համայնքում` սկսած Կոտայքի մարզից մինչեւ Սյունիքի մարզ, որպես բացառիկ հանրային գերակա շահ, հողատարածքներ կօտարվեն Իրան-Հայաստան 400 կՎ լարման էլեկտրահաղորդման օդային գծի կառուցման համար: Վաղը Երվանդ Զախարյանը կառավարության հավանությանը կներկայացնի որոշման նախագիծը:
Օտարման ենթակա տարածքների ձեռք բերող է հանդիսանում «Բարձրավոլտ էլեկտրացանցեր» ՓԲԸ-ն, եւ ինչպես նշված է որոշման նախագծում, սեփականության օտարման գործընթացը սկսելու վերջնական ժամկետը 2015 թվականի մարտի 1-ն է, իսկ սեփականության oտարման գործառույթների իրականացումը համակարգող լիազոր մարմինը ՀՀ էներգետիկայի եւ բնական պաշարների նախարարությունն է:
Նելլի ԲԱԲԱՅԱՆ
