Aravot.am-ում այս տարվա հուլիսի 30-ին հրապարակվել էր «Սամվել Բալասանյանի թիկնապահները ծեծե՞լ են ավագանու անդամին» հոդվածը: Խոսքը ավագանու անդամ Վահան Հունանյանի մասին էր:
Ոստիկանության Գյումրի քաղաքի Կումայրիի բաժնի հետաքննիչ, ոստիկանության լեյտենանտ Ա.Սեդրակյանը նախապատրաստել էր նյութեր քրեական գործ հարուցելու համար: Ոստիկանության նշյալ բաժնի պետ, ոստիկանության փոխգնդապետ Ա.Ղարիբյանի պաշտոնական նամակով տեղեկացվում է, որ նյութերի նախպապատրաստման ընթացքում պարզվել է, որ բացատրություն է տվել Վահան Հունանյանը: Նա հայտնել էր, որ տեղյակ է կայքում տպագրված հոդվածից. «Սակայն իր հետ նման միջադեպ տեղի չի ունեցել, ինքը որեւէ մեկի հետ չի վիճաբանել, իրեն որեւէ մեկը չի ծեծել»:
Նկատենք, որ ավագանու անդամն, ըստ ոստիկանության, հրաժարվել է ներկայանալ դատաբժշակական փորձաքննության, նաեւ հրաժարվել էր հաղորդում տալուց:
Ոստիկանության պետի պաշտոնական նամակով տեղեկացվում է, որ բացատրություններ են վերցվել քաղաքապետարանի աշխատակիցներ Գառնիկ Մերոյանից, Օհաննա Ավդալյանից, Սամվել Սիմոնյանից եւ Ռոբերտ Ասատրյանից, ավագանու անդամներ Արամայիս Գրիգորյանից եւ Տիգրան Հովհաննիսյանից:
Կարդացեք նաև
Հանցագործության դեպքի բացակայության պատճառաբանությամբ մերժվել էր քրեական գործի հարուցումը:
Որոշումն ուղարկվել է նաեւ Շիրակի մարզի դատախազին:
Ռուզան ՄԻՆԱՍՅԱՆ
