ՀՀ ԱԺ պաշտպանության, ազգային անվտանգության եւ ներքին գործերի մշտական հանձնաժողովն առաջիկայում նախատեսում է փակ քննարկում անցկացնել, որին կհրավիրվեն ՀՀ պաշտպանության նախարարը, ոստիկանապետը եւ արտակարգ իրավիճակների նախարարը: Այսօր հանձնաժողովը նման որոշում կայացրեց առաջիկա նստաշրջանին ընդառաջ նիստում:
Օգոստոսի վերջին շաբաթվա ընթացքում հանձնաժողովի անդամներն այցելել են ՀՀ սահմանամերձ մի քանի բնակավայրեր եւ ԼՂՀ, հանդիպումներ են ունեցել եւ պաշտպանական, եւ ոստիկանական, եւ արտակարգ իրավիճակների համակարգերում: Արդյունքում, պատգամավորների մոտ բազմաթիվ հարցեր են կուտակվել, որոնց պատասխանները նրանք ցանկանում են ստանալ փակ քննարկումների ժամանակ:
Հանձնաժողովի նախագահ Կորյուն Նահապետյանը տեղեկացրեց, որ հոկտեմբերի առաջին տասնօրյակից հետո նախատեսված են 2015 թվականի բյուջեի նախագծի քննարկումները խորհրդարանական հանձնաժողովներում եւ առաջարկեց մինչ այդ հստակ օրակարգ ձեւավորել ու այդ քննարկումների ժամանակ էլ պատկան գերատեսչությունների ներկայացուցիչների առջեւ բարձրացնել վիճելի հարցերը: «Այս տարի բյուջեն բավական հանգամանալի կքննարկենք այդ գերատեսչությունների բյուջեն, հատկապես ծախսային մասը»,-ասաց նա:
Անկախ պատգամավոր Խաչատուր Քոքոբելյանն էլ նստած տեղից ռեպլիկ նետեց. «ԱԻՆ-ն ընդհանրապես պետք է փակել»: «Ժառանգություն» խմբակցության պատգամավոր Թեւան Պողոսյանն էլ նկատեց, որ սոցիալական պաշտպանվածության առումով ԱԻՆ համակարգի աշխատակիցներն ամենախոցելին են:
Կարդացեք նաև
Նելլի ԳՐԻԳՈՐՅԱՆ
