Լրահոս
Օրվա լրահոսը

Ամասիայի ամենախուլ գյուղերում տարին գոնե 3 հարսանիք լինում է

Սեպտեմբեր 02,2014 14:43

Այսօր Aravot.am-ը Շիրակի մարզպետարանի տարածքային վարչության պետ Կարլեն Աբրահամյանից (լուսանկարում) հետաքրքրվեց, թե՞ կա Շիրակի մարզում որևէ գյուղ, որտեղ վաղուց ի վեր նոր ընտանիքներ չեն կազմվել, հարսանիքներ չեն եղել, ծնելիություն չկա:

Նկատենք, որ օրերս Շիրակի մարզի մանկավարժների տարեսկզբյան խորհրդակցության ժամանակ խոսվեց գյուղական դպրոցների թերբեռնվածության, սակավաթիվ աշակերտներ ունենալու մասին, խոսքը հատկապես Աշոցքի ու Ամասիայի գյուղերի մասին էր:

Ի պատասխան մեր հարցի, Կարլեն Աբրահամյանն ասաց. «Ծնելիությունը միգուցե շատ չէ, բայց կա: Իսկ հարսանիքներ ամեն տեղ էլ լինում են: Ես երկու անգամ ընթերցել եմ, որ Սյունիքի մարզում մի երկու տեղ հարսանիքներ չեն եղել վերջին տարիներին, բայց մեզ մոտ, բարեբախտաբար, դեռ նման գյուղական համայնք չկա: Կարող է՝ քիչ են հարսանիքները, բայց կան, ասենք մի տեղ տարվա մեջ 3 անգամ, մյուս տեղում 100 հատ… Չկա որևէ գյուղ, որտեղ առաջին դասարանցիներ չլինեն, ուղղակի Աշոցքի ու Ամասիայի բնակչությունն է քիչ, նոսր է, իսկ դա ծնելիության ցածր մակարդակով չէ պայմանավորված, այլ ի սկզբանե խտաբնակ չի եղել»:

Իսկ ի՞նչ է անում կառավարությունը սակավաբնակ տարածքները բնակեցնելու, ծնելիությունը Ամասիայում ու Աշոցքում խթանելու ուղղությամբ: «Միջոցներ, անխոս, ձեռնարկվում են, սակայն դա միայն մարզային խնդիր չէ, իսկ Աշոցքն ու Ամասիան ի սկզբանե նոսր բնակեցված են: Ամասիան ադրբեջանցիներով բնակեցված տարածք էր, այստեղ ի սկզբանե անասնապահություն է հիմնական զբաղմունքը, հողագործությունը ինչ-որ ձևով հետ է կանգնել: Այստեղ այլ ազգը (խոսքը ադրբեջանցիների մասին է) չոբանություն էին անում, ես կարծում եմ, որ չոբանություն անելն ավելի պատվաբեր է, քան Յակուտիայում լապատկա բռնելը կամ նպաստի վրա նստելը: Իհարկե, մեր ազգն էլ է զբաղվում անասնապահությամբ, բայց ոչ ինտենսիվ, ոչ մասսայական. կա ազգային սպեցիֆիկայի հարց, արդյոք սիրո՞ւմ են այդ մասնագիտությունը, արդյոք չե՞ն ասում՝ բա իմ տղան կամ աղջիկը գնան ուրիշի կովերը կթե՞ն»,- ասաց Կարլեն Աբրահամյանը:

Նունե ԱՐԵՎՇԱՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Սեպտեմբեր 2014
Երկ Երե Չոր Հնգ Ուրբ Շաբ Կիր
« Օգո   Հոկ »
1234567
891011121314
15161718192021
22232425262728
2930