Այսօր ժամը 18.50-ին սահմաններում մոտ մեկ ժամ տևողությամբ հոսանքազրկվեց ողջ Գյումրին`խուճապի մատնելով բնակիչներին: Պատճառը ամենայն հավանականությամբ անսպասելի ուժեղ քամին ու տեղացող հորդառատ անձրևն է, որին, փաստորեն, պատրաստ չեն մեր էներգամատակարարները: Նշենք, որ էլեկտրաէներգիայի սակագնի բարձրացմանը զուգընթաց, գնալով վատթարել է Գյումրու էլեկտրամատակարարումը:
Aravot.am-ը անընդմեջ բողոքներ է լսում Գյումրու տարբեր թաղերի բնակիչներից այն մասին, որ հոսանքի տատանումներից փչացել է տան տեխնիկան`սառնարանը, համակարգիչը, էլ չենք խոսում այն մասին, որ հոսանքազրկումների պատճառով անընդմեջ խափանվում է Aravot.am-ի աշխատանքները Գյումրիում:
Գյումրու այսօրվա հոսանքազրկումը, միգուցե այդքան չզայրացներ բնակիչներին, եթե երեկ ՀՀ նախագահ Սերժ Սարգսյանի ձեռամբ չկտրվեր «Բարձրավոլտ էլեկտրացանցեր» ՓԲԸ-ի «Գյումրի 2 ենթակայանի» ժապավենը, որի վերանորոգման համար մեր կառավարությունը Գերմանիայի զարգացման վարկերի KFW բանկից 14.6 միլիոն վարկ է վերցրել: Իսկ ենթակայանը տարածաշրջանի համար ունի ռազմավարական կարևոր նշանակություն. երեկ պատասխանատուները իրենց հարցազրույցներում հպարտորեն խոսում էին հարևան Վրաստանին, անգամ Թուրքիային էլեկտրաէներգիա մատակարարելու մասին: Մասնավորապես նշում էին, որ տեխնիկապես այլևս պատրաստ են տարածաշրջանին էլեկտրաէներգիա մատակարարելու. հարց է առաջանում` իսկ Գյումրին այս տարածաշրջանի մեջ չի մտնո՞ւմ…
Կարդացեք նաև
Նունե ԱՐԵՎՇԱՏՅԱՆ
