ԱԺ ՀՀԿ-ական պատգամավոր Լեռնիկ Ալեքսանյանը վստահեցնում է, որ ԱԺ նախագահն արձագանքել ու քննադատել է շաբաթներ առաջ ԱԺ անվտանգության պետի ու լրագրողի միջեւ տեղի ունեցած քաշքշուկին:
Պարոն Ալեքսանյանը դեռ խուսափում է ԱԺ աշխատակցի արարքը որակել բռնություն լրագրողի հանդեպ:«Չգիտեմ՝ ինչ է եղել, ոնց է եղել, բայց տգեղ երեւույթ է: Մանրամասներին տեղյակ չեմ: Բայց որ ԱԺ նախագահն արձագանքել է,դատապարտել է, դա գիտեմ»,- մեզ հետ զրույցում ասաց պատգամավորը:
Մեր հարցին, ինչո՞ւ է թաքուն, ներքին կարգով դատապարտել, պարոն Ալեքսանյանն ասաց. «Կարող է հրապարակային արձագանքը հետո լինի, բայց արձագանքել է:
Մանրամասները պետք է ուսումնասիրվի, որ օբյեկտիվ գնահատական տրվի: Հիմա դժվարանում եմ ասել՝ ով ում վրա է հարձակվել, բայց դրան գնահատականը կտրվի: Դեռ պետք է, բա որ հաստատվի մեղավոր չի եղել, չէ՞ որ կա անմեղության կանխավարկած»:
Կարդացեք նաև
ՀՀԿ խմբակցության պատգամավոր Կարինե Աճեմյանն էլ ասաց, որ դեռ քննություն է կատարվում, հանգամանքները պարզելու համար. «Ամեն ինչ պետք է անենք, որ մեր հասարակությունում բռնությունը բացառվի, բայց հատկապես լրագրողների հանդեպ, որ նրանք իրենց պարտականությունը կատարելիս երբեւէ որեւէ խոչընդոտի չհանդիպեն»:
Մեր հարցին, ինչո՞ւ ԱԺ նախագահը չարձագանքեց հրապարակային, նա ասաց. «Երեւի թե ԱԺ նախագահը պետք է որոշի, երբ ու ինչին արձագանքի»:
Արփինե ՍԻՄՈՆՅԱՆ
