«Ազգային ժողովում բարձրացվեց սահմանապահ զինվորների կենցաղային վիճակի բարելավման հարցը, որպես երիտասարդներ, ինչպես կարող ենք մասնակից դառնալ այդ գործընթացին»,- այսօր Երեւանի պետական համալսարանում ուսանողներից մեկը հարց ուղղեց ՀՀ պաշտպանության նախարար Սեյրան Օհանյանին:
«Ես խորհուրդ կտամ դիմել Շուշան Պետրոսյանին: Նա է այդ հարցը բարձրացրել, ես ասացի, որ առաջին գծի ամենակարևոր խնդիրը մարտական հերթապահությունն է, ինժեներական սարքավորումները, կառույցները, որոնք այսօր իրականացված են մարտական հերթապահության համար և պատրաստ՝ վերախմբավորումից անցնել հիմնական պաշտպանության: Այդ ինժեներական կառույցները հագեցած են: Մի քանի ինժեներական կառույցների առկայությունն առաջին գծում թույլ են տալիս կանխել հակառակորդի դասական ոճով մարտական գործողությունների սկսումը»,- ասաց նախարարը՝ բուն հարցի մասին էլ հավելելով. «Ես նրան ուղղորդեցի, որ այդ աջակցությունն ուղղված լինի մշակութային միջոցառումների և սոցիալական խնդիրների իրականացման համար: Կարծում եմ, որ Շուշան Պետրոսյանի հարցադրումը որևէ մի հիմնադրամի ստեղծումն է, որտեղ հանգանակություններ կանեն և այն կուղղեն առաջին գծի սոցիալական խնդիրների լուծմանը»:
Նախարարը հավելեց նաեւ, որ առաջին գծում համապատասխան գետնատնակներ, կենցաղային պայմաններ ստեղծված են, որպեսզի զինծառայողի սոցիալ-կենցաղային պայմանները նորմալ լինեն. «Դրանք պարբերաբար, իհարկե, պետք է թարմացվեն, դրանք ծառայության ընթացքում մաշվում են, այդ ուղղությամբ ցանկացողները կարող են շուշանի հետ ստեղծել համապատասխան հիմնադրամ և ըստ անհրաժեշտության աջակցել»:
Կարդացեք նաև
Ուսանողներից մեկն հետաքրքրվեց, թե ինչպե՞ս է Սեյրան Օհանյանը վերաբերվում «Ժառանգություն» խորհրդարանական խմբակցության առաջարկած նախագծին՝ տարկետումը վերացնելու մասին: «Ժառանգությունն» իր նախաձեռնությունը հիմնավորել էր նրանով, որ այդ իրավունքից օգտվում են հիմնականում մեծահարուստների երեխաները՝ բանակից խուսափելու համար:Սեյրան Օհանյանն ասաց, որ ինքը կողմ է տարկետումը վերացնելուն ու հավասար պայմաններին:
Այլ մանրամասները՝ տեսանյութում
Նելլի ԳՐԻԳՈՐՅԱՆ
Եթե Շուշան Պետրոսյանը պատկերացում ունենար ԱԺ պատգամավորի աշխատանքից, հաստատ իր գործով կզբաղվեր, կամ կերգեր, իսկ բանակի խնդիրները կթողներ այդ գործով զբաղվողներին, առավել ևս, որ ինչ վերաբերվում է առաջնային գծին ու մարտական հերթապահությանը, ՊՆ լիարժեք է կատարում: