Այսօր՝ սեպտեմբերի 16-ին, «Արամ Խաչատրյան» համերգասրահում Հայաստանի պետական երիտասարդական նվագախմբի երաժիշտները, բացառությամբ գլխավոր դիրիժոր եւ գեղարվեստական ղեկավար Սերգեյ Սմբատյանի, ջինսերով էին:
Պատճառը համերգի ձեւաչափն էր. նույն բեմում Երիտասարդական նվագախմբի հետ հանդես եկան դիջեյ Սուիչը (Միացյալ Թագավորություն) և Բիթբոքսի հայկական ասոցիացիայի ղեկավար Բագրատ Տերտերյանը: Հանդիսատեսին ներկայացվեց Սերգեյ Պրոկոֆեւի բրիտանացի թոռ Գաբրիել Պրոկոֆեւի՝ Ձայնարկչի եւ նվագախմբի համար կոնցերտը, ինչպես նաեւ Մայլս Հենքոքի՝ Ձայնարկչի, բիթբոքսերի եւ նվագախմբի կոնցերտը:
Այդ յուրատեսակ համերգ-փորձարարությամբ տրվեց Արամ Խաչատրյանի անվան երկրորդ փառատոնի մեկնարկը: Փառատոնն անցկացվում է Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության դեսպանության հովանու ներքո և Բրիտանական խորհրդի աջակցությամբ:
Բացման համերգը նվիրված էր Երևանի պետական համալսարանի (ԵՊՀ) հիմնադրման 95-ամյակին: Դրան նախորդել էր ԵՊՀ-ի մասին պատմող փոքրիկ ֆիլմ:
Կարդացեք նաև
Հայաստանում Մեծ Բրիտանիայի արտակարգ եւ լիազոր դեսպան Քեթրին Լիչը համերգը որակեց ֆանտաստիկ, հավելելով որ նման փորձարարություն առաջին անգամ է տեղի ունենում տարածաշրջանում: Սերգեյ Սմբատյանի մասին էլ նշեց, որ նա ուղղակի առաջ հրելով ընդլայնում է երաժշտության սահմանները:
Գոհար ՀԱԿՈԲՅԱՆ
բացի ապականումից, անգլո-սաքսերից ուրիշ բան իհարկե սպեսել հնարավոր չէ