Արամ Հարությունյանի կարծիքով՝
ոչ թե հետեւանքների, այլ խնդրի դեմ պետք է պայքարել
«Ինձ թվում է՝ այդ ստորագրությունները Սերժ Սարգսյանն իր համար պետք է հավաքի, որ տեսնի, թե քանի հոգի կուզենա, որ նա լինի Հայաստանի Հանրապետության նախագահ: Ես համոզված եմ, որ այս դեպքում հավաքված ստորագրությունները մի քանի տոկոսը չեն անցնի: Մեր կուսակցությունը եւ անձամբ ես այն կարծիքին ենք, որ որեւէ հարցի չանդրադառնանք ու հիմնական խնդիրը պետք է լինի Սերժ Սարգսյանին իշխանությունից հեռացնելը: Թե չէ՝ անընդհատ փորձում ենք իր քայլերը մեկնաբանել, կամ նշանակումների հետ կապված՝ կարծիք հայտնել, իսկ դա ավելորդ աշխատանք է, դրա համար ոչ իր նշանակումների հետ եմ հույս կապում, ոչ էլ դատապարտում կամ նորմալ ընդունում: Եթե մի իշխանության, նախագահի հիմնական խնդիրը վերարտադրությունն է եւ իր շրջապատին ու իրեն հարստացնելը, նրանից ամեն ինչ սպասելի է: Սուրիկ Խաչատրյանը երեւի նրան պետք է ապագա ընտրությունների համար, դրանք կլինեն հանրաքվեի տեսքով, թե պառլամենտական՝ կարեւոր չէ: Կրկնում եմ, մենք չպետք է հետեւանքների դեմ պայքարենք, որի պատճառը Սերժ Սարգսյանն է: Համակարգային փոփոխություն ասելով՝ ես գտնում եմ, որ առաջին հերթին պետք է նա հեռանա, քանի որ այդ համակարգի գլխին նա է, եւ եթե ինքը մնալու է ինչ-որ ձեւով, ապա այս համակարգը երբեք չի փոխվի»,- «Առավոտի» հետ զրույցում ասաց «Ազգային համաձայնություն» կուսակցության նախագահ Արամ Հարությունյանը՝ անդրադառնալով Սուրիկ Խաչատրյանի օգտին Սյունիքում կազմակերպվող ստորագրահավաքին, որը, շրջանառվող լուրերի համաձայն, վերջինին հանձնարարել է հենց ինքը՝ նախագահը, ասելով, որ եթե ստորագրահավաքն արդարացնի իրեն, ապա Սուրիկ Խաչատրյանը կվերանշանակվի իր նախկին պաշտոնին: Իսկ սա այն ամենի ֆոնին, որ ՀՀԿ խոսնակ Էդուարդ Շարմազանովը օրերս հայտարարել էր, որ իրենց նպատակը իշխանությունների վերարտադրությունը չէ:
Հարցին՝ Սուրիկ Խաչատրյանի վերադարձը հնարավոր համարո՞ւմ եք, Արամ Հարությունյանը նշեց, որ մեր նախագահից ամեն ինչ սպասում է: «Նա իշխանությունը պահելու համար պատրաստ է ամեն ինչի: Հիմա, Սուրիկ Խաչատրյանին վերադարձնելու փաստն այս կոնտեքստում կտեղավորվի, թե չէ, սա ուրիշ խնդիր է, բայց, որ Սերժ Սարգսյանից ամեն ինչ սպասելի է՝ որեւէ տարակուսանք չկա»,- հայտնեց նա:
Հավելենք, որ Էդուարդ Շարմազանովը հանդես եկավ նաեւ հայտարարությամբ, այն մասին, որ Սերժ Սարգսյանը երկար տարիներ ղեկավարելու է ՀՀԿ-ն, որն էլ երկար տարիներ մնալու է Հայաստանի ամենաազդեցիկ կուսակցությունը։
ԵՎԱ ՀԱԿՈԲՅԱՆ
Կարդացեք նաև
«Առավոտ» օրաթերթ
16.09.2014
