«Մեծ Բրիտանիան Ադրբեջանի հետ ունի բիզնես կապեր, բայց դա որեւէ նշանակություն չունի»,- լրագրողների հետ զրույցում նշեց Հայաստանում Մեծ Բրիտանիայի դեսպան Քեթի Լիչը:
Նրա խոսքերով՝ Բրիտանիան հետաքրքրվածություն ունի տարածաշրջանի երեք երկրներին էլ կայուն եւ խաղաղ իրավիճակում տեսնել: Նա հավելեց, որ տարածաշրջանում Մեծ Բրիտանիան չի ուզում հակամարտություն տեսնել նաեւ այն պատճառով, որ Ադրբեջանի հետ բիզնեսային հարաբերություններ ունի:
Քեթի Լիչը հույս հայտնեց, որ Բրիտանիան կատարում է տարածաշրջանի լարվածությունը զսպողի դեր, բայց այդ դերը, նրա կարծիքով, այնքան մեծ չէ, որքան ԱՄՆ-ինը կամ ԵԱՀԿ Մինսկի խմբինը. «Բայց ես հուսով եմ, որ Բրիտանիան կարողանում է իր դերն ունենալ` պաշտպանելով ԵԱՀԿ Մինսկի խմբի համանախագահների գործողությունները»:
Անդրադառնալով շրջանառվող լուրերին, թե Հայաստանը հոկտեմբերի 10-ին անդամակցելու է Եվրասիական տնտեսական միությանը, դեսպանը նշեց, որ Հայաստանն իր որոշումը կայացրել է եւ Բրիտանիան հարգում է Հայաստանի այդ որոշումը.
«Հասկանալուց հետո, թե Հայաստանը ի՞նչ պարտավորություններ ունի այդ համաձայնագրի շրջանակում՝ մենք պատրաստ ենք համագործակցել եւ ավելի խորացնել մեր հարաբերությունները, հատկապես տնտեսական համագործակցությունները»:
Կարդացեք նաև
Ամի ՉԻՉԱԿՅԱՆ
