Լրահոս
Օրվա լրահոսը

Կայացավ Ալբերտ Օհանյանի նոր երգիծական գրքի շնորհանդեսը

Սեպտեմբեր 18,2014 18:55

Այսօր գրող, ակադեմիկոս Ալբերտ Օհանյանը նշեց իր ծննդյան 75-ամյակը: Օրը գրողի համար հիշարժան էր նաև նրանով, որ ՀՀ մշակույթի նախարարության կողմից արժանացավ ոսկե մեդալի և տեղի ունեցավ իր «Խորամանկ Արշակի արկածները» գրքի շնորհանդեսը: Գրքում 20 երգիծական պատմվածքներ են՝ ավանտյուրիստական բնույթի: Գլխավոր հերոսն իրական կյանքից է վերցված:

P9183796

«Ընդհանրապես հայ գրականության մեջ ավանտյուրիստական ժանրը գրեթե բացակայում էր, չհաշված 2-3 գիրք (օրինակ՝ Րաֆֆու «Խաչագողի հիշատակարանը»): Ես փորձել եմ այդ բացն ինչ-որ ձևով լրացնել»,– ասում է գրքի հեղինակը:

Ա. Օհանյանն ասում է, որ շատ ունի պատմվածքներ, սակայն ֆինանսական խնդիրների պատճառով հնարավոր չէ բոլորը տպել: Գրքում կան իրական կերպարներ, ինչպես Վ. Պետրոսյանը, Վարդերեսյանը, Պարույր Սևակը և այլոք. «Մոտ 2 պատմվածքում զետեղել եմ Պարույր Սևակի կերպարը: Դա չէր կարող այլ կերպ լինել. նա իմ ուսուցիչն էր և նա է ինձ հայացրել»:

P9183793

Գրախանութներում «Խորամանկ Արշակի արկածները» գիրքը հասանելի չէ. ինչպես նշում է գրողը՝ տպաքանակը հազիվ իր ծանոթներին է բավականացնում: «Եթե վաճառքի էլ դնեմ, չի վաճառվի: Նույնիսկ Պարույր Սևակի և Հովհաննես Շիրազի գրքերը չեն գնում»,– կարծում է գրողը:

Ի դեպ, Ալբերտ Օհանյանը ծնվել է Վրաստանում, որոշ ժամանակ ապրել է Հայաստանում, իսկ հիմա աշխատում է Ռուսաստանում: Այժմ նա Ռուսաստանի և Մոսկվայի գրողների միությունների քարտուղարն է, նաև՝ Ռուսաստանի մշակույթի վաստակավոր գործիչ: «Նա այս 75 տարիների մեջ շատ բան ունի հպարտանալու, մենք էլ ուրախ ենք, որ նա մեր գրական դեսպանն է Ռուսաստանում»,– ասում է Հայաստանի գրողների միության նախագահ Էդվարդ Միլիտոնյանը:

Այսօր նաև Հայաստանի գրողների միության մի քանի անդամներ՝ գրողներ, գրականագետներ, թարգմանիչներ, Ռուսաստանի գրողների միության կողմից արժանացան Գրիբոյեդովի, Եսենինի և Լերմոնտովի մեդալների:

 

Աննա ԽԱՉԱՏՐՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Սեպտեմբեր 2014
Երկ Երե Չոր Հնգ Ուրբ Շաբ Կիր
« Օգո   Հոկ »
1234567
891011121314
15161718192021
22232425262728
2930