Անդրանիկ Հունանյանը համոզված է` նախկին օրենքներով էլ հնարավոր կլիներ խոշոր բիզնեսի ներկայացուցիչներին բերել հարկային դաշտ:
Այսօր` սեպտեմբերի 23-ին, մայրաքաղաքի տարբեր տոնավաճառներից մի խումբ առեւտրականներ բողոքի ակցիա էին իրականացնում կառավարության շենքի դիմաց: Ցուցարարները դժգոհում էին «Շրջանառության հարկի մասին» օրենքից:
Հիշեցնենք` օրենքը շրջանառության մեջ է մտնում հոկտեմբերի 1-ից, համաձայն դրա` առեւտրականնները պետք է տրամադրեն ապրանքաշրջանառության վերաբերյալ փաստաթղթերը: Առաջին անգամ չներկայացնելու դեպքում` առեւտրականը նախազգուշացում է ստանալու, երկրորդ անգամ` տուգանվելու է 20 հազար դրամի չափով, իսկ երրորդ անգամ` շրջանառության 5 տոկոսի չափով:
Առեւտրական Անդրանիկ Հունանյանը Aravot.am-ի հետ զրույցում նշեց, որ երկրում այնպիսի իրավիճակ է ստեղծվել, որ շատ դժվար է փաստաթղթերով աշխատել. «Երկրում այնպիսի իրավիճակ է, որ շատ դժվար է փաստաթուղթ ճարելը ու հագուստի բիզնեսի մեջ գտնվող մարդիկ հիմնականում պարտքով են վերցնում ապրանքը: Այդ մարդիկ մյուսներից չեն կարող փաստաթղթեր պահանջել»:
Կարդացեք նաև
Անդրադառնալով վարչապետ Հովիկ Աբրահամյանի հետ հանդիպմանը` պարոն Հունանյանն ասաց, որ համոզված է` նախկին օրենքներով էլ հնարավոր կլիներ խոշոր բիզնեսի ներկայացուցիչներին բերել հարկային դաշտ.«Եթե իրենք ապաշնորհ ձեւով են կառավարում, չեն կարողանում խոշորներին բերել, հիմա ի՞նչն է օգնելու իրենց: Եթե հիմա փոքրերին ասում են` իրականում մենք փոքրերին չենք «կպնելու», բայց եթե դուք փոքրերին չեք «կպնելու», ինչպես էլ լինի փոքրերի միջոցով եք անելու: Ասում են` գրի’, թե ումից ես վերցրել, ինչպես կարո՞ղ է այդ մարդը գրի` ումից է վերցրել, մի տեսակ ճիշտ չէ, մարդիկ «գործ տվող» են դառնում»:
Նա հավելեց, որ առեւտրականները վախի մթնոլորտում են գտնվելու, քանի որ, եթե վարչապետի պաշտոնին մեկ ուրիշը գա, արդյունքում` իրենք կհայտնվեն ծանր իրավիճակում.«Արդյունքում` ժողովուրդն իշխանությունից շատ մեծ հիասթափություն է ապրում, ինչի՞ համար: Չեմ հասկանում` ովքե՞ր են մտածում, ովքե՞ր են դրանք գրում` հաշվի չառնելով ժողովուրդի կարծիքը: Ասում են` մենք խորհրդակցել ենք Հ/Կ-ների հետ, բայց չէ՞ որ դուք դուրս չեք եկել, մարդկանց հետ չեք խորհրդակցել»:
Ամի ՉԻՉԱԿՅԱՆ
