«Կ. Դեմիրճյանի անվան մարզահամերգային համալիրը նոր անուն ունի»,-ահազանգում է համալիրի ներկայացուցիչ Կորյուն Գրիգորյանը:
Նա Aravot.am-ին ասաց, որ համալիրին տվել զորամասի կարգավիճակ, անունն էլ փոխել են. «Արդեն փոխված է համալիրի անունը՝ Կարեն Դեմիրճյանի անվան մարզահամերգային համալիրի փոխարեն կոչվում է Ծիծեռնակաբերդի մարզահամերգային համալիր»:
Պարոն Գրիգորյանի խոսքով՝ դեռ չի լուծվել համալիրը ժամանակին վարձակալած տասներկու անհատների գույքի վերադարձման խնդիրը. «Անտրամաբանական է, որ սեպտեմբերի 21-ի՝ անկախության օրվան նվիրված միջոցառումը տեղի ունեցավ զավթված ու գրավված կառույցում՝ ապօրինաբար շահագործելով ուրիշի գույքը»:
Նա նաեւ պատմեց, որ սպայի տունն է տեղափոխվել համալիր. «Աբսուրդների շարքից է, որ մարզահամերգային համալիրը տնօրենի փոխարեն արդեն ունի հրամանատար»: Վերջում էլ հավելեց, որ իրենց իրավունքները շարունակելու են պաշտպանել իրավական հարթությունում. «Մեզ համար առաջնային է մեր բարի համբավը, ոչ թե գումարը: Ինչ իրենք անում են` շատ մեծ հարված է մեր երկրի վարկանիշին»:
Կարդացեք նաև
Համալիրի փաստաբան Արմինե Հակոբյանն էլ ասաց, որ համալիրի գույքը արգելանքից հանելու մասին իրենց հայցն է դատարան մտել, դատական նիստերը եկող շաբաթից կսկսվեն:
ՊՆ-ից համալիրի վերաբերյալ Կորյուն Գրիգորյանի հայտնած տեղեկություններին չեն ցանկանում արձագանքել: «Մարզահամերգային համալիրի հետ կապված անհիմն ու պրովոկացիոն խոսակցություններին չենք արձագանքում»,- հայտարարել է ՊՆ նախարարի մամուլի խոսնակ Արծրուն Հովհաննիսյանը:
Արփինե ՍԻՄՈՆՅԱՆ
