ԲՀԿ նախագահ Գագիկ Ծառուկյանը հանդիպեց ՀԺԿ նախագահ Ստեփան Դեմիրճյանի հետ (Տեսանյութ)

ԲՀԿ նախագահ Գագիկ Ծառուկյանը հանդիպեց ՀԺԿ նախագահ Ստեփան Դեմիրճյանի հետ (Տեսանյութ)

Գագիկ Ծառուկյանի հայտնի հարցազրույցը բազմաթիվ հարցերի առաջադրում ու միաժամանակ հստակ պատասխաններ ուներ: Գլխավոր խնդիրը հանուն մեր ժողովրդի բարօրության ու ամուր պետության հրամայականն էր, որի շուրջ էլ ծավալվել էր ԲՀԿ առաջնորդի հարցազրույցը: Հստակ էր, որ միայնակ ոչ ոք ոչինչ անել չի կարող: Անհրաժեշտ է ժողովրդի վստահությունն ու քաղաքական ուժերի համագործակցությունը՝ հանուն բարեկեցիկ ու բարգավաճող երկրի: 

Հարցազրույցին անմիջապես հաջորդեցին քաղաքական ուժերի ու հասարակական գործիչների արձագանքները՝ համագործակցության տանող հստակ քայլերով: Այս ընթացքում տեղի ունեցավ հանդիպում ՀՀ առաջին նախագահ Լևոն Տեր-Պետրոսյանի հետ, հաջորդեցին քննարկումներ քաղաքական այլ ուժերի հետ: Այս անգամ Գագիկ Ծառուկյանը հյուրընկալեց ՀԺԿ ներկայացուցիչներին՝ կուսակցության ղեկավար Ստեփան Դեմիրճյանի գլխավորությամբ:

ԲՀԿ նախագահը նշեց, որ առաջնորդվել է ու շարունակելու է գործել մեկ սկզբունքով՝ հարգանք քաղաքական հակառակորդների նկատմամբ, համագործակցություն երկրի համար կարևորագույն հարցերում:

«Միմյանց վարկաբեկելուց, վիրավորելուց ու հայհոյելուց ոչ մի հարց չի լուծվելու: Դրանից մեր ժողովրդի բարեկեցությունը չի բարձրանալու: Անիմաստ չարությունն ու թշնամանքը իմ ու իմ քաղաքական ուժի պայքարում տեղ չունեն»,-ընդգծեց Գագիկ Ծառուկյանը: 

Պայմաններ, հնարավորություն, արդարություն ու մրցակցություն. այս ամենի դեպքում է հնարավոր խոսել մեր ժողովրդի ցանկությունների կատարման մասին, ժողովուրդ, որն, ըստ ԲՀԿ նախագահի, պատրաստ է նպաստավոր պայմանների դեպքում արարել ու շենացնել իր երկիրը: 

Շնորհակալություն հայտնելով ընդունելության ու գործակցության առաջարկի համար՝ Հայաստանի ժողովրդական կուսակցության նախագահը, անդրադառնալով Սահմանադրության փոփոխությանը, նկատեց, որ դրա հասարակական պահանջը չկա: 

«ԲՀԿ օրակարգում երկու հարց է՝ ոչ իշխանական ուժերի առաջ քաշած 12 կետերի իրականացում, որն էապես կբարելավի մեր քաղաքացիների կյանքը ու կթուլացնի առկա լարվածությունը և սահմանադրական փոփոխությունների գաղափար, որտեղ կան շատ հարցականներ ու անընդունելի պահեր»,-նշեց Գագիկ Ծառուկյանը: 

«Ժողովրդի վստահության վերականգնումը պետք է լինի բոլորիս խնդիրը»,-իր հերթին ընդգծեց ՀԺԿ նախագահ Ստեփան Դեմիրճյանը: 

«Ես կարծում եմ, որ ոչ մի իշխանություն իրավունք չունի խաղալու ժողովրդի համբերության հետ, իրավունք չունի հարցերը չլուծել՝ մտածելով, որ ժողովուրդը միևնույն է համբերելու է: Սա լավ բանի չի բերի»,-հանդիպման ավարտին նշեց Գագիկ Ծառուկյանը՝ հավելելով, որ ժողովուրդը բարձրացնում է ցավոտ հարցեր, ցավոտ խնդիրներ, և դրանք լուծել է պետք:

 

Աղբյուրը՝ «Բարգավաճ Հայաստան» կուսակցության պաշտոնական կայքէջ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք