«Առաջին անգամը, չէ որ ավտոերթ ենք անցկացնելու: Նախորդ անգամ ճանապարհային ոստիկանությունը կանգնեցրեց մեզ հենց Արշակունյաց փողոցում` մեծ խցանում առաջացնելով, և մենք չկարողացանք առաջ շարժվել: Ինչևէ, դա էլ էր պայքարի ձևը»,- այսօր «Նոյան տապան» ակումբում ասաց «Դուրս մեր գրպանից» քաղաքացիական նախաձեռնության անդամ Վարդան Հակոբյանը:
Հետո հիշեցրեց իրենց պահանջը. «Պահանջում ենք հարկային համաներում: Չի՞ կարելի արդյոք համաներում անել, շտկել բոլոր անճշտությունները, և ամեն ինչ սկսել մաքուր էջից»:
Նախաձեռնության անդամները վաղը հերթական ավտոերթն են նախաձեռնել, սկսելու են Պարոնյանի անվան թատրոնի դիմացից: «Սահմանդրությամբ բոլորս էլ իրավունք ունենք չհնազանդվելու այն օրենքներին, որոնք պարտադրվել են մեզ»,- ասաց պարոն Հակոբյանը՝ նշելով, որ մինչ օրս ավտոերթի մասնակիցներից որեւէ մեկը խախտումներ կատարելու համար չի տուգանվել:
Նա պատմեց, որ ԴԱՀԿ-ից էլ իրենց վստահեցրել են, որ չկա դեպք, որ քաղաքացիներից ստացված որևէ դիմումի ընթացք չտան. «ԱԺ-ն իր թեթև ձեռքով ոստիկանությանը հանձնեց արդարադատություն իրականացնելու գործառույթը` դուրս թողնելով դատարանները, որտեղ մարդիկ կարող էին բողոքարկել որոշումները. եթե գործը հասնում է ԴԱՀԿ, նշանակում է, որ այն արդեն քննվել է և այլևս բողոքարկման ենթակա չէ»:
Վերջում էլ դիմեց ավտովարորդներին.«Եթե ստացել եք ծանուցում, որի հետ համաձայն չեք, դիմեք ճանապարհային ոստիկանությանը: Եթե պատասխանը ձեզ չբավարարի, նոր միայն դիմեք մեզ»:
Արփինե ՍԻՄՈՆՅԱՆ
