Այսօր Մասիս քաղաքում Արարատի եւ Վայոց Ձորի մարզերի ընդհանուր իրավասության դատարանը դատավոր Թաթուլ Պողոսյանի նախագահությամբ շարունակվեց Արարատի մարզի Շահումյան գյուղի բնակիչ, ԲՀԿ անդամ, ԱԺ պատգամավոր, տուժող Կարո Կարապետյանի եւ ամբաստանյալ, Արարատի մարզի Ներքին Դվին գյուղի բնակիչ Արթուր Զադոյանի դատավարությունը:
Արթուր Զադոյանը մեղադրվում է այն բանում, որ նա ապօրինի կերպով ձեռք է բերել, պահել, կրել հրազեն եւ ռազմամթերք: 2009 թվականի հոկտեմբերի 5-ին ժամը 11:00-ի սահմաններում Արարատի մարզի Մարմարաշեն գյուղի հատվածում տեղի ունեցած վիճաբանության արդյունքում Կարո Կարապետյանի առողջությանը դիտավորությամբ պատճառել է միջին ծանրության վնաս եւ տվել սպանության սպառնալիքներ:
Ամբաստանյալի պաշտպան Սուսաննա Սարգսյանը բացարկի միջնորդություններ արեց սույն քրեական գործով մեղադրանքի պաշտպանությունն իրականացնող ՀՀ գլխավոր դատախազության հատկապես կարեւոր գործերով քննության վարչության ավագ դատախազ Կարեն Բիշարյանի եւ տուժող Կարո Կարապետյանի պաշտպան Կրոմվել Գրիգորյանի դեմ:
Նախագահող դատավորը երկու դեպքում էլ անցավ խորհրդակցական սենյակ եւ վերադառնալով՝ մերժեց միջնորդությունները:
Կարդացեք նաև
Դրանով այսօրվա դատական նիստն ավարտվեց: Հաջորդ նիստը կկայանա հոկտեմբերի 14-ին, ժամը 15:00-ին:
Աշոտ ՀԱԿՈԲՅԱՆ
