Հոկտեմբերի 10-ին Վենետիկի հանձնաժողովի նիստում` Փարիզում, կքննարկվի ՀՀ սահմանադրական բարեփոխումների հայեցակարգը և արդեն հոկտեմբերի 14-ին պարզ կլինի հանձնաժողովի վերաբերմունքը ներկայացված հայեցակարգի վերաբերյալ: Սահմանադրական դատարանի նախագահ Գագիկ Հարությունյանը հայտարարել էր, թե չի բացառվում, որ ՀՀ նախագահ Սերժ Սարգսյանը մերժի սահմանադրական բարեփոխումների` առաջարկված հայեցակարգը:
Aravot.am-ը «Ընդդեմ իրավական կամայականությունների» հ/կ նախագահ Լարիսա Ալավերդյանից հետաքրքրվեց`արդյոք հնարավո՞ր է զարգացումների այդ ընթացքը, տիկին Ալավերդյանը պատասխանեց. «Մեզ մոտ արդեն հասարակական կարծիք է ձևավորվել, այնպես որ, գործընթացները ոչ թե իրական, այլ իմիտացիոն բնույթ են կրում, դրա համար ցանկացած սցենարի զարգացում էլ հնարավոր է»:
Հետաքրքրվեցինք` խորհրդարանական համակարգին կողմնակի՞ց է, տիկին Ալավերդյանը պատասխանեց. «Խորհրդարանական, կիսանախագահական, թե նախագահական համակարգ լինի, մեզ մոտ խնդիրն այդ ոլորտում չէ: Տրամաբանական է անցումը նախագահական, կիսանախագահական և հետո խորհրդարանական համակարգին: Բայց խնդիրը իշխանության նախաձեռնությունների հանդեպ վստահության բևեռի մեջ է»:
Տիկին Ալավերդյանը նշեց, թե այդ վստահությունը ձեռք բերելու համար ինչ քայլեր չպետք է արվեն. «Պետք չէ վերադարձնել արդեն բավականին ծանր տպավորություն թողած նախկին պաշտոնյաներին, ընդհանուր առմամբ դա վերաբերում է վարչապետի պաշտոնին, որը մեզանում պետք է վաստակել իրենց աննախադեպ ծառայությունները մատուցելով առաջին դեմքին: Ցավոք, այդ շարքը ոչ միայն սկիզբ է առել վաղուց, այլև հիմա ավելի մեծ թափ է առել: Դա է պատճառը, որ իշխանության անգամ լավագույն նախաձեռնությունը վստահության խնդիր ունի` արդյոք դա նույն խմբի և քաղաքական ուժի վերարտադրության վտանգ ունի, թե ոչ»:
Տիկին Ալավերդյանն այս համատեքստում հիշեցրեց ՀՀ ԱԺ փոխնախագահ, ՀՀԿ մամուլի խոսնակ Էդուարդ Շարմազանովի հայտնի հայտարարությունը և դատապարտեց նման գործելաոճը. «Դա նշանակում էր, թե պետք է իմանաք` ում թրի տակով անցնեք: Ցավոք, դա մեզ մոտ նորմ է դարձել»:
Կարդացեք նաև
Տաթև ՀԱՐՈՒԹՅՈՒՆՅԱՆ
