Արեւմտահայերի ազգային համագումարի խորհրդի փոխնախագահ Կարեն Միքայելյանը համոզված է, որ Հայաստանի իշխանությունները չեն կարող բարձրացնել արեւմտահայերի պահանջատիրության հարցը: «Հայաստանի իշխանությունները խորհրդային Հայաստանի իրավահաջորդն են: Իսկ խորհրդային Հայաստանը ստորագրել է Կարսի պայմանագիրն ու հրաժարվել հայկական պահանջատիրությունից: Այսօրվա Հայաստանի իշխանությունները, լինելով խորհրդային Հայաստանի իրավահաջորդ, ոչ մի պահանջ լիազորված չեն, իրավունք չունեն բարձրացնել: Հայաստանի իշխանությունները նույնիսկ Արցախի նկատմամբ պահանջներ չունեն, չեն ճանաչում, որովհետեւ կրկնում եմ՝ Խորհրդային Հայաստանի հետնորդն են»,- Aravot.am-ին ասաց պարոն Միքայելյանը: Նա նաեւ հիմարություն համարեց աշխարհի տարբեր երկրներում բնակվող հայերի կողմից ստեղծված Արեւմտյան Հայաստանի կառավարությունն ու խորհրդարանը, ասաց ՝ նրանց էլ ոչինչ չի հաջողվի. «Այդպիսի պետություն ստեղծել են թղթի վրա ու այն հեռանկարային չէ»: Պարոն Միքայելյանը անիմաստ է համարում Հայաստանի իշխանությունների ջանքերը՝ հայոց ցեղասպանության միջազգային ճանաչման ուղղությամբ.« Դա ոչինչ չի տալու, որ ճանաչեն, ի՞նչ, ներողություն խնդրեն, վերջացա՞վ: Ես Թուրքիայի տեղում լինեի, ներողություն կխնդրեի, կվերջացնեի հարցը: Լավ է՝ չճանաչեն, խայտառակ կլինենք: Հայաստանի իշխանություններն այնքան անպատրաստ են, որ Թուրքիան ճանաչի հայոց ցեղասպանությունը, հետո՞, ի՞նչ են անելու՝ ոչ մի բան»: Արփինե ՍԻՄՈՆՅԱՆ
