Կարմիր խաչի միջազգային կոմիտեն Քարվաճառում գերի ընկած ադրբեջանցի դիվերսանտների հետ կապված մեկնաբանություններ է արել:
Ինչպես հայտնում է «ԱՊԱ»-ն, Կարմիր Խաչի միջազգային կոմիտեի ադրբեջանական ներկայացուցչության հասարակայնության հետ կապերի բաժնի ղեկավար Իլահա Հուսեյնովան նշել է, որ իրենք տեղյակ են ադրբեջանցի գերիների դեմ նախապատրաստվող դատական գործընթացից.
«Կարմիր խաչի միջազգային կոմիտեն պարբերաբար այցելում է այդ անձանց և իրենց ընտանիքի հետ կապեր հաստատելու հնարավորություն է ստեղծում: Ժնևյան կոնվենցիաների համաձայն, ձերբակալված անձանց նկատմամբ պետք է մարդասիրական վերաբերմունք ցուցաբերվի և նրանց համար համապատասխան պայմաններ ստեղծվեն: Միջազգային մարդասիրական իրավունքը չի բացառում մեղադրյալների նկատմամբ դատական գործընթացի հնարավորությունը: Սակայն, միևնույն ժամանակ, միջազգային մարդասիրական իրավունքը դատավարության հետ կապված իրավական երաշխիքներ է մշտապես պահանջում», – ասել է Հուսեյնովան՝ նշելով, որ դատական գործընթացի վերաբերյալ Կարմիր խաչը որևէ մեկնաբանություն չի տալիս:
Այս տարվա հուլիսին Քարվաճառում վնասազերծվել էր 3 հոգուց բաղկացած ադրբեջանական դիվերսիոն խումբ: Նրանցից մեկը՝ Հասան Հասանովը, սպանվել էր: Մյուս երկուսը՝ Դիլհամ Ասկերովը և Շահբազ Գուլիևը, դատարանի առաջ կկանգնեն Ստեփանակերտում:
Կարդացեք նաև
Պատրաստեց Հովհաննես ԻՇԽԱՆՅԱՆԸ
