ԵԱՀԿ-ի Մինսկի խմբի համանախագահները Հայաստանի և Ադրբեջանի նախագահների՝ առաջիկա օրերին Փարիզում կայանալիք հանդիպման ժամանակ ակնկալում են խաղաղ համաձայնագրի հիմնական պահերի լուրջ քննարկումներ: Այդ մասին APA լրատվական գործակալության հարցին ի պատասխան հայտնել են ԵԱՀԿ-ի մամուլի ծառայությունում:
Ինչպես նշված է համանախագահների անունից մամուլի ծառայության տարածած հաղորդագրությունում, միջնորդները կարծում են, որ նախագահների հանդիպումները Սոչիում և Ուելսում կողմերի միջև «փոխգործողության ուղի» են հարթել:
«Մենք նաև հուսով ենք, որ նախագահները կպայմանավորվեն փոխադարձ վստահության և թափանցիկության հասնելուն ուղղված միջոցների վերաբերյալ: Համանախագահները պատրաստ են հնարավորինս օգնություն ցուցաբերել այդ ուղղությամբ», – ասված է հաղորդագրությունում:
Համանախագահները շեշտում են, որ իրենց կարծիքով՝ «Մինսկի խումբը միակ ձևաչափն է, որին կողմերը վստահում են Լեռնային Ղարաբաղի հակամարտության կարգավորումը խաղաղ ճանապարհով»:
Կարդացեք նաև
Միջնորդները կարծում են նաև, որ Հայաստանի անդամակցությունը Եվրասիական տնտեսական միությանը չի ազդի ղարաբաղյան հակամարտության լուծման գործընթացի վրա․ – «Լեռնային Ղարաբաղի հակամարտության կարգավորումը կախված է Ադրբեջանի և Հայաստանի նախագահների քաղաքական կամքից, այլ ոչ թե ինչ-որ պայմանագրի կամ դաշինքի միանալուց: Համանախագահները հուսով են, որ վերջին շփումներից հետո կողմերը կարող են տրամադրվել խաղաղության»:
Մանրամասները կարող եք կարդալ` «Ազատություն» ռ/կ-ի կայքում
