Ուղիղ երկու օրից` շաբաթ օրը կնշվի Գյումրի քաղաքի տոնը: Արդեն երկրորդ տարին է` «Գյումրին ԱՊՀ մշակութային մայրաքաղաք» տոնակատարությունների ցանկում անցկացվում է նաև հացի փառատոն, որն, ի դեպ, ամենատպավորիչն է: Անցած տարի արդեն նախկին վարչապետ Տիգրան Սարգսյանը քաղաքի ողջ տոնակատարություններից առանձնացրեց հատկապես այս փառատոնը` կառավարության մյուս անդամների հետ ժամեր շարունակ ծանոթանալով ցուցադրվող հացատեսակներին ու հերթով համտեսելով դրանք:
Որպես կանոն` հացի փառատոնը նախապես գովազդվում է հեռուստատեսությամբ ու համացանցով: Այս անգամ հացի փառատոնի գովազդային տեսահոլովակում նկարահանվել են ոչ թե դերասաններ, այլ Աշոցքի շրջանի Թավշուտ գյուղի դաշնակցական գյուղապետ Սուրեն Սարգսյանը` իր անչափահաս որդու հետ:
Aravot.am-ը տեսահոլովակի հեղինակ, լրագրող Աննա Մարտիկյանից հետաքրքրվեց, թե ինչո՞ւ ընտրեց հենց այս գյուղապետին: «Այդ տեսահոլովակը նկարել ենք անցած տարվանից: Քանի որ Շիրակի մարզը հայտնի է որպես հացի շտեմարան, Շիրակի մարզի հայագիտական կենտրոնի, մասնավորապես էթնոհոգեբան Կարինե Սահակյանի մոտ մտահղացավ հացի փառատոն անցկացնելու գաղափարը: Նա երկար տարիներ` հնագույն շրջանից մինչև օրս, ուսումնասիրել է, թե ինչպես է հացը պաշտամունքի առարկա եղել հայերիս մոտ: Նա դիմեց ինձ տեսահոլովակ նկարահանելու. հացի պաշտամունքը պատկերավոր ներկայացնելու խնդրանքով: Ես էլ որոշեցի ստեղծել տեսահոլովակ ` վեր հանելով հացն արարող գյուղացու կերպարը: Մտածեցի, որ ոչ մի դերասան չի կարողանա ավելի լավ խաղալ, քան այն մարդիկ, որոնց համար հացը կենցաղ լինելուց բացի, ազգային ավանդույթներն ու իրենց պապերի պատգամը շարունակելու պատասխանատվություն է: Չնայած գիտեմ, որ Գյումրու Վարդան Աճեմյանի անվան դրամատիկական թատրոնի դերասանները շատ տաղանդավոր են, բայց ամեն դեպքում ընտրեցի Թավշուտի դաշնակցական գյուղապետ Սուրեն Սարգսյանին: Իհարկե, շատ գյուղերում շրջեցի, շատերի հետ շփվեցի ու վերջնականապես որոշեցի նրան առաջարկել նկարահանվելու իմ տեսահոլովակում: Տեսա, որ նա հայրենասեր հայ գյուղացու տիպիկ կերպար է, կոլորիտով, իր հողն ու ջուրը սիրող անձնավորություն: Ինքն էլ ոչ միայն սիրով համաձայնեց իմ առաջարկին, այլ շատ արագ, մեկ ժամվա ընթացքում գտավ տարազը, որով պիտի նկարահանվեին ինքն ու իր որդին: Հիմա հացը քաղում են տեխնիկայի օգնությամբ, բայց տեսահոլովակում ցույց ենք տալիս, թե ինչպես են հնում քաղել հացը գերանդիով: Ժամանակն է, որ ազնիվ աշխատանքով հաց վաստակողները գովազդվեն էկրանում, այլ ոչ թե ջիփերով շրջագայող ու անարդար ճանապարհով ապրող ցուցամոլները: Այժմ վավերագրական ֆիլմ ենք նկարահանում հացի մասին, որտեղ հայ գյուղացուն դարձյալ կմարմնավորի Թավշուտի գյուղապետը» ,- ասաց մեր զրուցակիցը:
Թավշուտի գյուղապետ Սուրեն Սարգսյանն էլ Aravot.am-ի հետ զրույցում ասաց, որ նկարահանվելու առաջարկ ստանալուն պես համաձայնել է, որովհետև պիտի ազգային տարազ կրեր ու մեր ավանդույթները վեր հաներ: «Անկեղծ ասեմ, ինձ տարազ կրելու գաղափարը շատ ոգևորեց, ինձ հունձ անել սովորեցրել է պապս: Ես մեծ սիրով համաձայնեցի, որովհետև տարազը մարդու ծննդավայրն է, մեր ծննդականն է, իսկ ես պատրաստ եմ մեր ավանդույթները ամեն ձևով պրոպագանդել: Իհարկե, ես դերասան չեմ, այդ տեսահոլովակում էլ հանդես չեկա որպես դերասան, ես ցույց տվեցի այն, ինչ իրականում ես կամ», -ասաց գյուղապետը:
Կարդացեք նաև
Նունե ԱՐԵՎՇԱՏՅԱՆ
