Այսօր կառավարության նիստից հետո լրագրողների հետ զրույցում կրթության եւ գիտության նախարար Արմեն Աշոտյանն ասաց, որ անհանգստացած է երիտասարդ դասախոսների նպատակային սոցիալական վճարների հետ առաջացած խնդրով, իսկ ֆինանսների նախարար Գագիկ Խաչատրյանն իրեն ասել է, որ խնդիրը դեռ չի կարգավորվել:
Հիշեցնենք, որ կուտակային պահումների պատճառով, ըստ մամուլի հրապարակումների Մայր ԲՈՒՀ-ից 33 դասախոս է հեռացել, ինչից հետո ՀՀ վարչապետ Հովիկ Աբրահամյանը հանձնարարել է ֆինանսների նախարարությանը զբաղվել երիտասարդ դասախոսներին նպատակային սոցիալական վճարից ազատելու խնդրով:
Արմեն Աշոտյանի խոսքերով` «Խոսում էի իմ գործընկերոջ հետ, ասաց, որ որոշակի տեխնիկական դժվարություններ կան՝ ծրագրային լուծում տալու համար, բայց լուծումն անպայման տրվելու է: Իրականում սա սպառնալիք է ու մարտահրավեր բուհական կադրերի երիտասարդացման հարցին: Ես խոսել եմ նաեւ ՏՀՏ մի շարք կազմակերպությունների հետ, նրանք էլ են սպասում խնդրի լուծմանը, որովհետև այն մասնագետները, որոնք իրենց մոտ են աշխատում ու զուգահեռ ԲՈՒՀ-երում, բայց հեռացել են ԲՈՒՀ-երից, պատրաստ են վերադառնալ: Մենք մի քանի ամիս կորցնում ենք, բայց դե հուսով եմ, որ խնդիրը լուծում կստանա»:
Պարոն նախարարի ներկայացմամբ, խնդիրը կարելի է լուծել հետեւյալ կերպ` մասնավոր հատվածում ու զուգահեռ ԲՈՒՀ-երում աշխատող երիտասարդները չպետք է նպատակային սոցիալական վճար կատարեն այն աշխատավարձից, որն ստանում են մասնավոր հատվածից:
Կարդացեք նաև
Նելլի ԲԱԲԱՅԱՆ
