Վերջին շրջանում հայաստանյան թատերական աշխարհում իրարանցում է սկսվել դերասան, ռեժիսոր, ՀՀ արվեստի վաստակավոր գործիչ Վիգեն Ստեփանյանի անվան շուրջ: Շրջանառվում են խոսակցություններ, թե նա նշանակվել է Ալ. Սպենդիարյանի անվան օպերայի եւ բալետի ազգային ակադեմիական թատրոնի գլխավոր ռեժիսոր, մի մասն էլ՝ ռեժիսորական խմբի ղեկավար: Ասում են նաեւ, որ նա սկսել է պարտաճանաչ հաճախել թատրոնի խաղացանկային ներկայացումներին:
2-3 օր առաջ «Առավոտը» կապվեց ճանաչված արվեստագետի հետ, սակայն նա ոչ հաստատեց, ոչ էլ հերքեց մեր տեղեկությունը: Ընդամենն ասաց՝ «դեռ վաղ է այդ մասին խոսելը»: Նախօրեին Ազգային օպերային թատրոնի տնօրեն Անդրանիկ Արզումանյանը հայտնեց, որ Վիգեն Ստեփանյանը ընդունվել է թատրոն՝ ոչ թե գլխավոր ռեժիսոր, այլ պարզապես ռեժիսոր:
Ճանաչված արվեստագետների մի մեծ բանակ ողջունում է Վիգեն Ստեփանյանի մուտքը օպերային թատրոն, նախ նշելով, որ նա իսկական երեւանցի է, հետո էլ փաստում՝ արվեստագետի հարուստ ստեղծագործական կենսագրությունը ինչպես թատրոնում, այնպես էլ՝ կինոյում:
Հակիրճ ներկայացնում ենք նրա գործունեությունը. 1989թ. Վիգեն Ստեփանյանը հիմնել է «Արձագանք» թատրոն-ստուդիան, որը 1991թ. հիմք է դարձել «Մետրո» թատրոնի ստեղծմանը, որտեղ նա հանդիսացել է գեղարվեստական ղեկավարն ու տնօրենը: 1994-2003թթ. աշխատել է Լիբանանում, վերադառնալուց հետո էլ կրկին ստանձնել է «Մետրո»-ի գեղարվեստական ղեկավարի պարտականությունները: Իսկ 2007-ից աշխատել է տարբեր թատրոններում՝ որպես հրավիրված դերասան ու բեմադրիչ: Խաղացել է շուրջ 100 դեր, բեմադրել 4 տասնյակից ավելի ներկայացում, այդ թվում՝ նաեւ արտերկրում: Նկարահանվել է մոտ 50 ֆիլմում, նաեւ՝ ԽՍՀՄ տարբեր ստուդիաներում, հանդես է եկել ավելի քան 60 հեռուստաներկայացումներում: Երեք տարի շարունակ արվեստագետը հանդիսացել է «Էրեբունի-Երեւան» տոնակատարության բեմադրիչը: Սեփական սցենարով Վիգեն Ստեփանյանը բեմականացրել է շուրջ 10 պիես: Ավելին՝ նրա սցենարով նկարահանվել է 2 կարճամետրաժ եւ 1 լիամետրաժ ֆիլմ:
Կարդացեք նաև
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
30.10.2014
Վիգեն Ստեփանյանն իսկապես լավ արվեստագետ է, բայց ինչ է նշանակում՝ իսկական երեւանցի է: Կարելի է մտածել՝ Երեւանը հանճարների բնակատեղի է , Հայաստանի մարզերից էլ տաղանդներ չեն ծնվում: Կոռեկտ չէ
Վիգեն Ստեփանյանը ռեժիսոր չի նշանակվել, այլ՝ գլխավոր ռեժիսոր: Եվ նա դա հաստատել է:
https://newsbook.am/?p=42388&l=am
Դե, Օպերայում բեմադրություններ իրականացրած Արշակ Բուրջալյանը, Վարդան Աճեմյանը, Արմեն Գուլակյանը, Հրաչյա Ղափլանյանը, Տիգրան Լևոնյանը, Ռաֆայել Ջրբաշյանը, Վահագն Բագրատունին երևանցիներ չէին: Նորայր Սարգսյանից հետո վերջապես երևանցի է գտնվել…
Կրկնվում ա Վիգենը: