Նոտարական պալատի բացումից առաջ «Կոնգրես» հյուրանոցում հրավիրվել էր սեմինար-քննարկում՝ կապված նոտարական գործունեության, այդ գործունեությունը կարգավորող օրենսդրության հետ: Ողջույնի խոսքով հանդես եկած արդարադատության նախարար Հովհաննես Մանուկյանը ներկայացրեց նոտարիատի բարելավման հայեցակարգը, շեշտելով, որ օտարերկրյա գործընկերների հետ, մասնավորապես՝ գերմանացի գործընկերների հետ ակտիվ համագործակցություն կա: Նա անդրադարձավ հանրային ծառայությունները կարգավորելու, նոտարներին սպասվող նյութական պատասխանատվության ինստիտուտի ներդրմանը, համակարգի բարելավմանը միտված էլեկտրոնային նոտարների ձեւավորման խնդրին:
Գերմանիայի նոտարական պալատի փոխնախագահ Ռիխարդ Բոկի ելույթը թերեւս լավագույններից մեկը կարելի է համարել: Նա ընտրել էր մասնավորապես՝ անշարժ գույքի գնման, նոտարների կողմից առքուվաճառքի պայմանագրերը վավերացնելու խնդիրը, զուգահեռներ անցկացնելով Հայաստանի եւ Գերմանիայի համապատասխան օրենսդրության միջեւ: Ի տարբերություն Հայաստանի նոտարների, որը «Նոտարիատի մասին» օրենքի 55 հոդվածի համաձայն կարող է սահմանափակվել կողմերին ծանոթացնելով առքուվաճառքի պայմանագրին, Գերմանիայում նոտարները փաստական հանգամանքները պարտավոր են ձեռք բերել եւ նրանք կարող են պատասխանատվության ենթարկվել:
Կարդացեք նաև
Ըստ մեր հյուրի, ինքը նախկինում հանդիպել է Հայաստանի նախորդ արդարադատության նախարարի հետ, որը ցույց էր տվել դեռեւս չկառուցված շենքը, երբ կողմերը նոտարական վավերացմամբ առքուվաճառքի պայմանագիր են կնքում, ապա վաճառողը գումարներ է վերցնում, հետագայում սնանկ է ճանաչվում կամ փախչում է: Գերմանիայի օրենսդրությունը կարգավորում է այդ հարցը՝ հօգուտ բարեխիղճ գնորդի. նախնական պայմանագիր է կնքում ՝ «ունիվերսալ հրաշք» եւ նախնական պայմանագրի համաձայն գնորդը համարվում է սեփականատեր տվյալ անշարժ գույքի նկատմամբ:
Հայաստանի քաղաքացիական օրենսգրքի 224 հոդվածի 4-րդ մասով էլ կարելի է գնորդին պաշտպանել: Այնտեղ սահմանված է, որ գրանցվում է բնակարանի սեփականատերը, եթե նա վճարել է բաժնային մասի համար, այն չպետք է մտնի սնանկության զանգվածի մեջ:
Ռուզան ՄԻՆԱՍՅԱՆ
