Այս մասին Aravot.am-ի հետ զրույցում իր մտահոգությունները կիսեց Փանիկ գյուղի բնակիչ Կորյուն Ավագյանը, որը երեկ եկել էր մասնակցելու իրենց հարևան գյուղի` Արթիկի տարածաշրջանի Անուշավան համայնքի մատուռի վերաբացման ու օծման արարողությանը: «Գյուղական կյանքը շատ է բարդացել հիմա, եթե խոպան գնալը չլինի, կողքի բոլոր գյուղերը լրիվ մարած են: Փանիկից 60-70 տնտեսություն միայն Կամչատկայում են ապրում, ունենք մարդիկ նաև Վլադիվաստոկում, մարդիկ արդեն ընտանիքներով են տեղափոխվել: Մեր գյուղի տնտեսությունների քանակը 800 է, որից 276 դուռ արդեն փակ է»,- ասաց մեր զրուցակիցը:
Նա նաև կարծիք հայտնեց, որ Հանրապետական կուսակցությունը ինչքան շուտ հեռանա իշխանությունից, այնքան շուտ ժողովրդի աչքերին լույս կգա:
Իսկ ո ՞վ գա իշխանության, ո՞ւմ են տեսնում փանիկցիները երկրի նախագահի պաշտոնում, մեր զրուցակիցն ասաց . «Գագիկ Ծառուկյանին, ու գիտեք ինչի՞, էդ մարդուն պաշտոններ առաջարկեցին, բայց ինքը չվերցրեց, իրեն պետք չէին էդ պաշտոնները: Ինքը գյուղացի տղա է եղել, իրա ուժերով գնաց մրցման, բազուկը սեղմեց, 1 միլիոն դոլար հաղթեց, բերեց, դրեց բիզնեսի մեջ, ուրիշների պես չթալանեց, չգողացավ, էս չինովնիկները սաղ թալանչիներ են: Իսկ երբ որ օլիգարխն է գնում դեպի ժողովրդի կողմը, ժողովրդին պաշտպանելու, դա ամենալավ բանն է : Օլիգարխին ի՞նչ կա, ինքը ոչ մի բանի կարիք չունի , բայց տեսնում է, որ կողքի մարդը նեղության մեջ է, ինքը ուզում է պետական պաշտոնի լինել, որ պետական ռեսուրսը ծառայեցնի ի օգուտ ժողովրդի»,-մեկնաբանեց մեր փանիկցի զրուցակիցը:
Նունե ԱՐԵՎՇԱՏՅԱՆ
Ամեն ինչ տեղի է ունենում մարդու գլխում, ապա որից հետո կյանքում։ Կարծում եմ ամեն ինչ պարզ է։