Ուկրաինայի արևելքի ընտրությունները ճանաչելու համար Եվրամիության երկրներն այս շաբաթ կքննարկեն Ռուսաստանի դեմ պատժամիջոցների հնարավոր փոփոխությունները՝ հայտնել է ԵՄ արտաքին գործերի ծառայության ներկայացուցիչ Մայա Կոսնյաչիչը:
Ինչպես փոխանցում է «Ուկրինֆորմ»-ը՝ Կոսնյաչիչը, պատասխանելով այն հարցին, թե արդյո՞ք ԵՄ-ն պատրաստվում է խստացնել ՌԴ նկատմամբ պատժամիջոցները, ասել է, որ այդ հարցը մշտապես գտնվում է վերանայման ռեժիմում և այս շաբաթվա վերջում ԵՄ անդամ երկրները կքննարկեն այն:
Ռուսաստանի դեմ նոր պատժամիջոցներ կիրառելու մասին է խոսել նաև Գերմանիայի կառավարության պաշտոնական ներկայացուցիչ Շտեֆեն Զայբերտը:
«Դոյչե Վելլե»-ի փոխանցմամբ, Զայբերտը, նշելով, որ Բեռլինը չի ճանաչում Ուկրաինայի անջատականների այսպես կոչված ընտրությունները, անըմբռնելի է որակել Ռուսաստանի կողմից այն հարգելն ու ճանաչելը:
Կարդացեք նաև
«Եթե Ուկրաինայի արևելքում իրավիճակը շարունակի սրվել ու Մոսկվան չդադարի խառնվել այնտեղ տեղի ունեցաղ գործողություններին, ապա հնարավոր է անհրաժեշտություն լինի մտածել Ռուսաստանի նկատմամբ հետագա պատժամիջոցների մասին», – ասել է Զայբերտը:
Դոնեցկի և Լուգանսկի «ժողովրդավար հանրապետություններում» ընտրությունները կայացել են նոյեմբերի 2-ին: Երկու տեղում էլ ընտրվել են գործող «ղեկավարները»: Դոնեցկում՝ Ալեքսանդր Զախարչենկոն, Լուգանսկում՝ Իգոր Պլոտնիցկին:
Պատրաստեց Հովհաննես ԻՇԽԱՆՅԱՆԸ
