Կենտրոն եւ Նորք-Մարաշ վարչական շրջանների ընդհանուր իրավասության դատարան էին ներկայացել ոստիկանության գնդապետ Կարեն Բաբակեխյանը (լուսանկարում), նրա կինը՝ Դոնարա Նազարյանը, որդին՝ Ռուբենը՝ «Ֆինանսական բուրգի գործով»: Նրանք երեքն էլ ցուցմունք տվեցին դատարանում իրենց փաստաբան Լուսինե Օհանյանի ներկայությամբ:
Ցուցմունք տալուց հետո նախագահող Գագիկ Պողոսյանին հետաքրքրեց, թե արդյոք Բաբակեխյանը, նրա ընտանիքը որեւէ գույք խլե՞լ է ամբաստանյալ Արթուր Անդրեասյանից: «Եթե իմ ընտանիքը խլեր, ոստիկանության գնդապետ լինելով՝ հիմար չեմ, որ այն ձեւակերպեի կնոջս անունով»: Հետեւեց երկխոսությունը.
– Պաստմասսայե շշով խփե՞լ եք, հիշո՞ւմ եք:
– Ինչո՞ւ խփեի, ինչո՞ւ պլաստմասսայի շշով:
Կարդացեք նաև
– Երեւի ատրճանակ չի եղել ձեռքի տակ…
– Ձեռքերս լավ ամուր են:
Խոսքը Բաղրամյան պողոտայում գտնվող, Արթուր Անդրեասյանին պատկանող տարածքի մասին է:
Բաբակեխյանի կինը՝ Դոնարա Նազարյանն ասաց, որ ընտանիքով եղել են մոտ հարաբերությունների մեջ, որ Արթուրի եղբոր՝ Վիլիկի հարսանիքի քավորն են եղել: «2012թ. նոյեմբերի վերջին որդիս ասաց՝ բան եմ առնում քո անունով, պիտի առնենք: Բաղրամյանի վրա տղաս բան առավ»,- ասաց Դոնարան:
Դատախազի հարցին, թե տեղյա՞կ է եղել ամուսնու, տղայի գործերից: Կինը պատասխանեց. «Ամուսինս այնքան քիչ է խոսում, նույնն էլ տղաս»: Ապա հայտնեց, որ ինչ ցուցմունք հատուկ քննչականում տվել է՝ ճիշտ է: Դատավոր Գագիկ Պողոսյանը նկատեց. «Ինչ-որ բանի մասին խոսում եք, ասես կոշիկի մասին է, արդյոք հավասարազոր արժեք ունեն ինչ-որ բանը տարածքի հետ»: Վկան ասաց, որ 5 թոռնիկ ունի, զբաղված է, ուշադիր չէ այդ ամենին, գիտի, որ որդին սխալ բան չի անի: Ապա արդարացավ, որ ինքը չի խորացել շատ հարցերի մեջ:
Դատավորը նաեւ նկատեց, որ այն տպավորությունն է, որ նախաքննության ժամանակ ցուցմունք չի տվել տիկինը, որովհետեւ ինչի մասին որ խոսում էր դատարանում, այնպես էր խոսում, կարծես ոչինչ չգիտի:
Մինչդեռ, երբ հրապարակվեց նախաքննության ժամանակ նրա տված ցուցմունքը, պարզվեց, որ բավական իրազեկ է եղել որդու եւ ամուսնու գործունեությունից, մասնավորապես՝ որ ամուսինը մոտ է եղել ամբաստանյալի հոր՝ Վասիլի հետ, իսկ որդին էլ 170-180 հազար դոլար կանխիկ տվել է Արթուրին՝ դրա դիմաց վերցնելով բանկում գրավ դրված Արթուրի անշարժ գույքը, ապա այդ անշարժ գույքը իր անունով ձեւակերպելուց հետո, Ռուբենը գրավադրել է «Ամերիաբանկում»՝ որոշակի վարկի դիմաց:
Ռուզան ՄԻՆԱՍՅԱՆ
